‘माया भनेकै यस्तो होला’को टिजर सार्वजनिक, भदौ २६ मा प्रदर्शन

भदौ १, २०८३
0

काठमाडौं । रेखा थापा निर्देशित चलचित्र **‘माया भनेकै यस्तो होला’**को आधिकारिक टिजर सार्वजनिक भएको छ। प्रेम, सम्बन्ध र सामाजिक परिवेशलाई केन्द्रमा राखिएको चलचित्र भदौ २६ गतेदेखि देशभरका सिनेमाघरमा प्रदर्शनमा आउनेछ।

चलचित्रमा मदनकृष्ण श्रेष्ठ, दिल श्रेष्ठ, सृष्टि श्रेष्ठ, नम्रता श्रेष्ठ र नीति शाह मुख्य भूमिकामा छन्। विशेषगरी वरिष्ठ कलाकार दिल श्रेष्ठको उपस्थितिले चलचित्रमा अनुभवी कलाकारको बलियो पाटो थपेको छ। टिजरमा उनको भूमिकालाई भावनात्मक र सम्बन्धकेन्द्रित कथासँग जोडिएको संकेत गरिएको छ।

पूर्व मिस नेपाल सृष्टि श्रेष्ठ, नम्रता श्रेष्ठ र पूर्व मिस नेपाल इन्टरनेसनल नीति शाहसँगै उषा खड्गी पनि विशेष भूमिकामा देखिनेछिन्। लक्ष्मी गिरी, विशाल पहाडी, संगम भण्डारी, रवि डंगोललगायत कलाकारको पनि अभिनय छ।

करिब आठ वर्षपछि निर्देशनमा फर्किएकी रेखा थापाका लागि यो चलचित्र विशेष मानिएको छ। यसअघि उनले ‘हिम्मतवाली’ र ‘मालिका’ निर्देशन गरेकी थिइन्। यसपटक भने उनी अभिनयभन्दा निर्देशनमा केन्द्रित छिन्।

‘दिया एण्ड अमु फिल्म्स’को ब्यानरमा निर्माण भएको चलचित्रका निर्माता हरि नारायण श्रेष्ठ र माया देवी श्रेष्ठ हुन्। पटकथा ध्रुव लम्सालको रहेको चलचित्रको छायांकन सुदीप बरालले गरेका हुन्। चलचित्रको वितरण रिच इन्टरटेन्मेन्ट, एप्पल इन्टरटेन्मेन्ट र एफडी कम्पनीले गर्नेछन्।

टिजरले प्रेम, सम्बन्ध, अपेक्षा र पारिवारिक भावनाबीचको कथाको झलक प्रस्तुत गरेको छ। चलचित्रले दर्शकलाई कस्तो प्रभाव पार्छ भन्ने भने भदौ २६ गतेपछि नै तय हुनेछ।