गैरआवासीय नेपाली संघको मध्यपूर्व क्षेत्रिय बैठक सम्पन्न, १६ बुँदे घोषणापत्र जारी

• फणिन्द्र दाहाल
• भदौ १०, २०७५
• 0

वैदेशिक रोजगारलाई सुरक्षीत, व्यवस्थित र मर्यादित बनाउन आग्रह गर्दै गैरआवासीय नेपाली संघ (एनआरएनए) को छैठौँ मध्यपुर्व क्षेत्रिय बैठक १६ बुँदे घोषणापत्र जारी गर्दै सम्पन्न भएको छ ।

गत बिहिबार अनौपचारिकरुपमा सुरु भएको भेलालाई शुक्रबार प्रमुख आतिथि खानेपानी तथा सरसफाई मन्त्री विना मगरले उदघाटन गरेकि थिइन ।

भेलामा मध्यपूर्व क्षेत्रमा रहेका १२ मुलुकका एनसीसी अध्यक्षहरुले आ–आफ्ना धारणा राख्दै मध्यपूर्व क्षेत्रमा रहेका नेपाली श्रमिक तथा व्यवसायीहरुको समस्या, समस्या समाधानका उपाय तथा उनीहरुको सुरक्षाको विषयमा प्रस्तुती दिएका थिए । भेलामा आइसीसीका पदाधिकारीहरु, मध्यपूर्व एनसीसीका पदाधिकारी, विश्वका विभिन्न मुलुकका एनसीसी पदाधिकारी सहभागी थिए ।

सम्मेलनको उदघाटन गर्दै प्रमुख अतिति खानेपानी तथा सरसफाई मन्त्री मगरले वैदेशिक रोजगारीमा जानैपर्ने बाध्यताको अन्त्य गर्दै देशमै रोजगारी सिर्जनाका लागि सरकार योजनाबद्ध रुपमा अगाडि बढेको बताउदै वैदेशिक रोजगारमा रहेका कामदारको साथमा नेपाल सरकार रहेको अनुभुति हुने गरी सरकारले काम गरिरहेको बताइन ।

नेपाली काँग्रेसका नेता एवं पूर्वश्रममन्त्री रमेश लेखकले वैदेशिक रोजगार नेपालीको लागि बाध्यात्मक अवस्था भएको बताउदै यी कामदारहरुका समस्या समाधानको बाटो खोज्न सरकार तथा सम्वद्ध निकाय प्रतिवद्ध बन्नुपर्नेमा जोड दिए ।

एनआरएनका अध्यक्ष भवन भट्टले वैदेशिक रोजगारीमा गएका नेपाली कामदारको सामाजिक सुरक्षाको लागि संघले पेन्सन फन्डको अबधारणा ल्याएको र यसको कार्यान्वयन हुन सके विदेशबाट फर्किएपछि पनि स्वदेशमै उद्यम बन्ने वातावरण सिर्जना हुने बताए ।

यस्तै संस्थापक अध्यक्ष उपेन्द्र महत्तोले देशको आर्थिक समृद्धि भएमात्रै नागरीकको समृद्धि हुने बताउदै विदेशमा सिकेका ज्ञान, सीप र आर्जित पूजिलाई नेपालमा भित्र्याउन पहल गरिनुपर्नेमा जोड दिए ।

संघका प्रमुख सल्लाहकार जीवा लामिछानेले संघले वैदेशिक रोजगारीमा रहेका नेपालीहरुलाई उच्च प्राथमिकतामा राखेर विगत देखिनै काम गर्दै आएको जनाउदै अब सीपयुक्त जनशक्ति मात्र वैदेशिक रोजगारीमा जाने वातावरण बनाउनुपर्ने बताए ।

नेपाली दूतावास युएईका कार्यबाहक राजदूत सागर फुयालले वैदेशिक रोजगारीमा आउने कामदारलाई सचेतना फैलाउन निकै जरुरी रहेको बताए ।

तिन दिनसम्म चलेको भेलामा मध्यपूर्व क्षेत्रमा रहेका नेपालीको समस्या तथा समाधानका उपाय, सुरक्षित वैदेशिक रोजगार, रेमिट्यान्सको उपयोग, कामदारको सामाजिक सुरक्षा, स्वास्थ्य सुरक्षा, सीपमूलक तालिम लिएर मात्र वैदेशिक रोजगारीमा पठाउनुपर्ने विषय, वैदेशिक रोजगारीबाट फर्किएका कामदारलाई स्वदेशमा उद्यम बनाउन प्रोत्साहित गर्नुपर्नेलगायतको विषयमा बृहत छलफल भएको मध्यपूर्व संयोजक आरके शर्माले बताए ।

यस्तै भेलामा घरेलु महिला कामदारका विषय, फ्री भिसा फ्री टिकटको प्रभावकारी कार्यान्वयन, विदेशस्थित नेपाली नियोगबाटै पुनः श्रमस्वीकृति दिने विषयमा पनि छलफल भएको बताउदै मध्यपूर्व संयोजक शर्माले छलफल पछि निश्कर्ष निकाल्दै १६ बुदे घोषणापत्र जारी गरिएको र यसलाई कार्यान्वयन गराउनका लागि मध्यपूर्व क्षेत्रीय समिति प्रतिवद्ध रहेको बताए ।

गैरआवासीय नेपाली संघको अगस्ट २३–२५ तारिखमा दुबईमा सम्पन्न छैठौँ मध्यपुर्व क्षेत्रिय बैठकका निर्णयहरुको पूर्णपाठ

गैरआवासीय नेपाली संघको छैठौँ मध्यपुर्व क्षेत्रिय बैठक अगस्ट २३–२५ तारिखमा दुबईमा भब्य रुपमा सम्पन्न भएको जानकारी गराउन पाउँदा हामी खुसी भएका छौं । यो बैठकलाई सफल र भव्य रुपमा सम्पन्न गराउनको लागि प्रमुख आतिथ्यका लागि नेपाल सरकारको प्रतिनिधित्व गर्दै आउनु भएकी माननीय खानेपानी मन्त्री विना मगर, विशिष्ट अतिथि पुर्व श्रममन्त्री रमेश लेखक, युएईका लागि कार्यबाहक राजदूत सागर फुयाल, श्रम, रोजगार तथा सामाजिक सुरक्षा मन्त्रालयका प्रतिनिधि विपिन आचार्य अन्तर्राष्ट्रिय समन्वय परिषदका अध्यक्ष भबन भट्ट, संस्थापक अध्यक्ष डा. उपेन्द्र महत्तो, प्रमुख संरक्षक जीवा लामिछाने, अन्तर्राष्ट्रिय समन्वय परिषदका पदाधिकारीहरु, राष्ट्रिय समन्वय परिषदका प्रतिनिधिलगायतप्रति हामी हार्दिक आभार ब्यक्त गर्दछौं । यस सम्मेलनले वैदेशिक रोजगारलाई सुरक्षित, व्यवस्थित र मर्यादित वनाउनको लागि १६ बुँदे दुबई घोषणापत्र जारी गर्दछ ।

१. नेपाल सरकारले लागू गरेको शुन्य लागतमा कामदारलाई बैदेशीक रोजगारमा पठाउने नीतिलाई प्रभावकारी रुपमा कार्यान्वयनका लागि सम्बन्धित मुलुकसँग यथाशिघ्र श्रम सम्झौता गर्न आग्रह गर्ने । साथै, नेपाली कामदारलाई दक्ष बनाई र गन्तब्य देशबारे आबश्यक अभिमुखीकरण तालिम दिएर मात्रै पठाउने ब्यबस्था मिलाउन अनुरोध गर्ने ।

२. वैदेशिक रोजगारीमा जाने नेपाली कामदारलाई ठगीबाट जोगाउनका लागि नेपाली दूतावासबाटै मागपत्र प्रमाणीकरण गर्नुपर्छ भन्ने एनआरएनको मागलाई सरकारले सम्बोधन गरेकोमा स्वागत गर्दै यसलाई प्रभाबकारी र छिटो कार्यसम्पादन गर्नका लागि आधुनिक प्रविधि प्रयोग गरी कागजातविहिन प्रणालीद्धारा कार्यान्वयन गर्न आग्रह गर्ने ।

३. नेपाली कामदारलाई नेपाली दूतावासबाटै पुनः श्रम स्वीकृति दिने ब्यबस्था यथासिघ्र कार्यान्वयनमा ल्याउनको लागि पराराष्ट्र र श्रम, रोजगार तथा सामाजीक सुरक्षा मन्त्रालयलाई अनुरोध गर्ने ।

४. विदामा घर गएका खाडी क्षेत्रमा कार्यरत घरेलु कामदारलाई विशेष गरी महिला कामदार सोही रोजगारदाताकोमा काम गर्न चाहेमा अभिलेखीकरण गरी श्रम स्वीकृति दिन सरकारसंग आग्रह गर्ने । बैदेशिक रोजगारबाट फर्किएका महिलाहरुलाई देशमै पुर्नस्थापनाको लागि प्रशिक्षण तथा रोजगारीको कार्यक्रम देशव्यापी रुपमा सञ्चालन गर्न नेपाल सरकारलाई अनुरोध गर्ने । एक हजारभन्दा बढी महिलाहरु कार्यरत देशमा आवश्यकता अनुसार संंरक्षण गृह बनाउन नेपाल सरकारलाई आग्रह गर्ने ।

५. गैरआवासीय नेपाली संघले बिगतदेखि उठाउँदै आएको हजारे अभियान अर्थात् बैदेशिक रोजगारमा जाने नेपाली कामदारको सामाजिक सुरक्षाको ग्यारेन्टीको लागि आवश्यक ब्यबस्था गर्न नेपाल सरकारसग जोडदार माग गर्दछ ।

६. नेपाली भाषा, कला, साहित्य र संस्कृतिको संरक्षण, संम्बर्धन एवं प्रर्वधनका लागी हरेक देशमा एनआरएनले सञ्चालन गर्ने गरी नेपाली दूतावासको संरक्षकत्वमा रहने नेपाली सांस्कृतिक केन्द्र स्थापना गर्न सरकारलाई पुनः आग्रह गर्ने ।

७. एनआरएनको राष्ट्रिय समन्वय परिषदलाई विधिवत रुपमा सम्बन्धीत राष्ट्रमा दर्ता गराउन परराष्ट्र मन्त्रालयसँग समन्वय गरी आबश्यक सिफारीस प्रदान गर्न अन्तर्राष्ट्रिय समन्वय परिषदलाई आग्रह गर्ने ।

८. वैदेशिक रोजगारको क्षेत्रलाई व्यवस्थित गर्न परराष्ट्र, श्रम र गृह मन्त्रालयबीच समन्वय प्रभावकारी वनाउन एकीकृत विद्युतीय सुचना प्रणाली लागु गर्न अनुरोध गर्ने । वैदेशिक रोजगारीबाट फर्केका कामदारको दक्षतासहितको अभिलेख राख्न अनुरोध गर्ने ।

९. वैदेशिक रोजगारीको नाममा वैदेशिक रोजगार ऐन विपरीत भिजिट भिसा र कथित आजाद भिसाको नाममा कारोवार गर्ने र कामदारलाई अलपत्र बनाउने संलग्न कम्पनी वा ब्यक्तिलाई सम्बन्धीत कानुन बमोजिम कारबाही गर्न आग्रह गर्ने ।

१०. बिदेशमा रहेका नेपाली नागरिकहरुलाई मताधिकार दिन सर्वोच्च अदालतको आदेशलाई कार्यान्वयन गर्न सरकारलाई अनुरोध गर्ने ।

११. युएईको दुवई, लेवनान र इराकमा महाबाणिज्य दूतको कार्यालय तथा कानुनत पाँच हजार नेपाली कामदार रहेको देशमा श्रम सहचारी स्थापनाको लागि नेपाल सरकारलाई अनुरोध गर्ने ।

१२. नेपाली दुतावासमा कानुनी सेवा प्रदान गर्ने गरी आवश्यक्ता अनुसारको वकिलको यथाशिघ्र व्यवस्था गर्नु पर्ने । जेलमा रहेका कामदारको यथासिघ्र कानुनी प्रतिरक्षा गर्नुको साथै कोमामा रहेका नेपाली कामदारलाई स्वदेशमा ल्याई उचित स्वास्थ्य उपचारकोे प्रबन्ध मिलाउन अनुरोध गर्ने ।

१३. वैदेशिक रोजगारीबाट फर्केका नेपाली कामदारको सीप र दक्षता परिक्षण गरी १० लाख रुपैयाँ ऋण दिने सरकारको नीतिलाई प्रभाबकारी कार्यान्वयन गर्न सरकारलाई अनुरोध गर्ने । नेपाली कामदारलाई परिवारसग एकिकरण गर्न स्वदेशमै उद्यमशीलता गर्न एनआरएनले प्रोत्साहन गर्ने ।

१४. गैरआवासीय नेपालीको परिभाषा भित्र पर्नको लागि दुई बर्ष विदेशमा बस्नुपर्ने वर्तमान प्राबधानलाई सुधार गरी अन्तर्राष्टिय प्रचलन अनुसार एक आर्थिक बर्षमा १८२ दिन भन्दा बढी विदेशमा बसेको हुनुपर्ने व्यवस्था मिलाउन अनुरोध गर्ने । साथै, गैरआवासीय नेपाली अभियानमा सक्रियरुपमा संलग्न भई नेपाल फर्केका इच्छुक अभियन्ताहरुलाई गैरआवासीय नेपाली संघको क्रियाकलापमा संलग्न गराउन अन्तर्राष्टिय समन्वय परिषदलाई आग्रह गर्ने ।

१५. मध्यपूर्वका पर्यटकको लागि नेपाललाई आकर्षण गन्तव्य बनाउन एनआरएनले पर्यटन मन्त्रालयसँग सहकार्य गर्ने ।

१६. गैरआवासीय नेपाली संघको मध्यपूर्व क्षेत्रीय बैठकहरुले उठाउँदै आएका, घोषणा गरेका मुद्दालाई कार्यान्वयन गर्नको लागि क्षेत्रीय संयोजकको संयोजकत्वमा प्रत्येक राष्ट्रिय समन्वय परिषदका अध्यक्ष प्रतिनिधित्व रहने एक समिति गठन गर्ने ।