कांग्रेस केन्द्रीय सदस्यमा मलेसियाबाट विनोद बहादुर थापाको उम्मेदवारी

रोजगारमञ्च
अशोज १८, २०८३
0

नेपाली कांग्रेसको १५औँ महाधिवेशनमा नेपाली जनसम्पर्क समिति मलेसियाका पूर्व उपसभापति, प्रमुख संरक्षक तथा महासमिति सदस्य विनोद बहादुर थापाले केन्द्रीय सदस्य पदमा उम्मेदवारी घोषणा गरेका छन्।

मलेसियामा लामो समयदेखि कांग्रेसको संगठन तथा पार्टी गतिविधिमा सक्रिय थापाले आफ्नो उम्मेदवारीलाई प्रवासी नेपाली कांग्रेस कार्यकर्ता र जनसम्पर्क समितिको प्रतिनिधित्वसँग जोड्दै अघि बढाएका हुन्।

केन्द्रीय सदस्य निर्वाचित भए विदेशस्थित नेपाली जनसम्पर्क समितिबीचको समन्वय सुदृढ गर्ने, प्रवासी नेपालीका सरोकारलाई पार्टीको नीति निर्माण तहसम्म पुर्‍याउने तथा वैदेशिक रोजगारी, श्रमिकका समस्या, सामाजिक सुरक्षा र प्रवासी नेपालीका सामाजिक सरोकारलगायत विषयलाई प्राथमिकताका साथ उठाउने उनको एजेन्डा छ।

थापाले विदेशमा रहेका नेपाली कांग्रेसका कार्यकर्तालाई पार्टीको मूलधारसँग थप संस्थागत रूपमा जोड्नुपर्नेमा जोड दिएका छन्। प्रवासमा रहेका लाखौँ नेपालीसँग प्रत्यक्ष जोडिएका जनसम्पर्क समितिलाई केवल संगठन विस्तारको माध्यममा सीमित नराखी नीति निर्माण, प्रवासी नेपालीका अधिकार र श्रमिकका सवालमा प्रभावकारी भूमिका दिने आफ्नो प्राथमिकता रहेको उनले बताएका छन्।

मलेसिया नेपाली श्रमिकको प्रमुख गन्तव्य मुलुक भएकाले त्यहाँ कार्यरत नेपाली श्रमिकका समस्या र वैदेशिक रोजगारीसँग सम्बन्धित विषयलाई पार्टीको केन्द्रीय तहमा थप प्रभावकारी ढंगले उठाउने उनको भनाइ छ। श्रमिकको हकहित, सुरक्षित तथा मर्यादित वैदेशिक रोजगारी, सामाजिक सुरक्षा र विदेशमा रहेका नेपालीको राजनीतिक तथा सामाजिक सहभागिताका विषयलाई नीति निर्माणसँग जोड्नुपर्ने उनको धारणा छ।

जनसम्पर्क समिति मलेसियाको नेतृत्व तहमा काम गरेको अनुभव र महासमिति सदस्यका रूपमा पार्टीको सांगठनिक संरचनासँग जोडिएको अनुभवलाई केन्द्रीय भूमिकामा उपयोग गर्ने थापाको भनाइ छ। उनले प्रवासमा संगठन निर्माणका क्रममा हासिल गरेको अनुभवलाई पार्टीको केन्द्रीय संरचनासँग जोड्दै विदेशस्थित नेपाली कांग्रेसको संगठनलाई थप व्यवस्थित र प्रभावकारी बनाउने एजेन्डा अघि सारेका छन्।

थापाको उम्मेदवारीसँगै विदेशस्थित जनसम्पर्क समितिबाट कांग्रेसको केन्द्रीय नेतृत्वमा प्रतिनिधित्वको विषय पनि चर्चामा आएको छ। विदेशमा रहेका कांग्रेस कार्यकर्ताका आवाज, संगठनात्मक अनुभव र प्रवासी नेपालीका सरोकारलाई पार्टीको निर्णय प्रक्रियासँग कसरी जोड्ने भन्ने विषयलाई उनको उम्मेदवारीले प्राथमिकतामा ल्याएको छ।

थापाको उम्मेदवारीप्रति प्रवासमा रहेका कांग्रेस कार्यकर्ता तथा केही एनआरएनए अभियन्ताहरूले सामाजिक सञ्जालमार्फत समर्थन तथा शुभेच्छा व्यक्त गरेका छन्। एनआरएनए उपाध्यक्ष खगेन्द्र न्यौपाने र एनआरएनए एसिया–प्यासिफिकका पूर्व संयोजक हरि भट्टराईलगायतले थापाको उम्मेदवारीलाई समर्थन गर्दै सामाजिक सञ्जालमा धारणा सार्वजनिक गरेका छन्।