नेपालका सबै प्रदेशमा विश्वस्तरीय इन्टरनेट डाटा सेन्टर निर्माण गर्दै वर्ल्डलिंक

माघ १६, २०७७
0

डिजिटल नेपाल निर्माण गर्न सरकारको उद्देश्यलाई पछ्याउँदै नेपालको सबैभन्दा ठूलो इन्टरनेट सेवा प्रदायक कम्पनी वर्ल्डलिंकले नेपालका १४ ठूला शहरहरूमा इन्टरनेट डाटा सेन्टर (आईडीसी) निर्माण गर्ने घोषणा गरेको छ । यी डाटा सेन्टरहरु नेपालका हरेक प्रदेशमा कम्तिमा एउटा डाटा सेन्टर रहने गरी स्थापना गर्ने निर्णय गरिएको हो ।

१४ डाटा सेन्टरहरू मध्ये काठमाडौंको डाटा सेन्टर सबैभन्दा ठूलो, अन्तर्राष्ट्रिय मान्यता प्राप्त टियर ४ पावर प्रणालीमा डिजाइन भएको तथा टायर ३ प्रमाणीकरण सहितको हुनेछ भने अन्य बाँकी डाटा सेन्टरहरु मध्यम र सानो आकारको टायर २ प्रमाणिकरण भएको हुनेछ ।

यी डाटा सेन्टरहरू तटस्थ र सहप्रयोग सुविधायुक्त हनेछन । यसको अर्थ यो सुविधाले वर्ल्डलिंकको पूर्वाधार मात्र व्यस्थापन गर्दैन कि अन्य इन्टरनेट सेवा प्रदायकहरू, टेलिकमहरु लगायत सरकारी , निजी संस्थाहरू र सम्पूर्ण देशलाई लाई चाहिने सूचना प्रबिधि, दुरसंचार पूर्वाधारको व्यवस्थापन गर्नेछ ।

आगामी ३ बर्षमा वर्ल्डलिंकले डाटा सेन्टर निर्माण गर्न करिब तीन सय करोडको लगानी गर्ने छ । यसको उद्देश्य हाम्रो ग्राहकहरुलाई भरपर्दो र गुणस्तरीय इन्टरनेट सेवा दिन साथै डिजिटल नेपाल निर्माण गर्न सहयोग गर्नु हो। यी इन्टरनेट डाटा सेन्टरहरूको सुविधाले गर्दा सबै प्रयोगकर्ताहरुले इन्टरनेट सामग्रीहरु छिटो, सस्तो र अधिक विश्वसनीय स्तरको पाउनेछन ।

यहाँसम्म कि सरकारी र निजी संस्थाहरूले उनीहरूको आफ्नो डिजिटल र क्लाउडमा आधारित पूर्वाधारहरु संचालन गर्न एउटा धेरै नै सुरक्षित र भरपर्दो विश्वस्तरीय सुविधा प्राप्त गर्नेछन । वर्ल्डलिंकले डाटासेन्टर निर्माणमा नेपाल दुरसंचार प्राधिकरण, नेपाल विद्युत प्राधिकरण तथा नेपाल सरकारसँग सहकार्य गर्ने छ र यो पूर्वाधार डिजिटल नेपालकै अति महत्वपूर्ण पूर्वाधारको रुपमा स्थापित हुनेछ ।

विश्वव्यापी रुपमा इन्टरनेट ट्राफिक अभूतपूर्व तवरले बृद्धि भइरहेको छ जसले गर्दा इन्टरनेटको पूर्वाधारमा दबाव र प्रयोगकर्तालाई प्राप्त हुने इन्टरनेटको अनुभव र गति बिग्रिँदै गएको छ । गुणस्तरिय किसिमको इन्टरनेट प्रयोगका लागि सकेसम्म प्रयोगकर्ताहरूको नजिक स्थानीय रूपमै सर्भरहरू हुनु आवश्यक हुन्छ, जसले इन्टरनेट सामग्रीहरुलाई प्रयोगकर्ताहरूको लागि भण्डार गर्दछ । नेपालले इन्टरनेट ट्राफिकमा पनि डिजिटल सेवाहरूको उपयोगमा उल्लेखनिय बृद्धि हुने सम्भावना देखिरहेको छ ।

यसबाहेक सरकारले डिजिटल नेपाललाई नेपाल सरकारको राष्ट्रिय गौरव परियोजनाको रूपमा पनि घोषणा गरेको छ, त्यसैले अब दुरसंचार पूर्वाधार, नेटवर्क र विकसित प्रबिधिको ठूलो आवश्यकता पर्नेछ । सरकार र निजी क्षेत्रका संस्थाहरूले छिटो उच्च प्रबिधियुक्त डिजिटल प्रबिधिहरूसँग अनुकूल बनाउनुपर्ने हुन्छ र साथै क्लाउडमा आधारित सेवाहरुमा समेत छिटो भन्दा छिटो अघि बढ्नु पर्नेछ । यस आवश्यकतालाई पूरा गर्न नेपाल भित्र एक सुरक्षित र भरपर्दो अन्तर्राष्ट्रिय मान्यता प्राप्त तथा सुबिधा भएको डाटा सेन्टर हुनु हालको समयको आवश्यकता रहेको छ ।

सम्बन्धित शीर्षकहरु