नौ महिनादेखि ठप्प रहेको काठमाडौं-दिल्ली उडान आजबाट शुरु, दुवै देशले दैनिक दुई वटा उडान भर्ने

पुस २, २०७७
0

नौ महिनादेखि ठप्प रहेको काठमाडौं नयाँ दिल्ली उडान आजबाट शुरु भएको छ । नेपाल वायु सेवा निगमको एयरबस ए थ्रि ट्वान्टी विमान त्रिभुवन अन्तर्राष्ट्रिय विमानस्थलबाट आज विहान एघार बजे दिल्लीका लागि प्रस्थान गरेको हो ।

आठ जना बिजनेस क्लास र एक सय ३८ जना इकोनोमिक क्लासको यात्रु लिएर विमान दिल्ली गएको हो । काठमाडौं–नयाँदिल्ली गन्तव्यमा नेपाल–भारत दुवै देशले दैनिक दुई वटा उडान भर्ने निगमले जनाएको छ ।

महामारी भन्दा अघिसम्म निगमले दिल्लीका लागि प्रत्येक दिन दुई वटा उडान भर्दै आएको थियो । भारतले भने डिसेम्बर चौबिस तारिखबाट काठमाडौं उडान भर्ने बताइएको छ ।

कोरोना भाइरस संक्रमणपछि जारी उडान प्रतिवन्ध फुकुवा गर्दै अन्तर्राष्ट्रिय उडानका लागि गत साता भारतले सहमति दिएको थियो । कोरोना संक्रमणका कारण चैत ११ गतेबाट नेपाल–भारत उडान बन्द भएको थियो ।