एसिया भ्रमणमा जापानका शेरचन, कतारका गुरुङ र यूएईका गोर्खाली
- रोजगारमञ्च
- अशोज २२, २०८०
- 0
गैरआवासीय नेपाली संघको आगामी नेतृत्वका लागि विभिन्न पदमा उम्मेदवारी घोषणा गरेका उम्मेदवारहरु यतिबेला आफ्नो पक्षमा समर्थन बटुल्न दौडाहामा निस्केका छन् । कोही उम्मेदवार आफ्नो भ्रमण सकेर स्वदेश फर्किसकेका छन् भने कोही भ्रमणका क्रममा नै छन् ।
एनआरएनएको महाधिबेशनको मिति नजिकिदै जाँदा जापानका रविन शेरचन, कतारका प्रविन गुरुङ र यूएईका मनोज गोर्खाली एसियाका देशहरुको भ्रमणमा निस्केका छन् । एनआरएनएको आगामी कार्यकालका लागि शेरचनले आइसीसी उपाध्यक्ष, गुरुङले आइसीसी उपमहासचिव र गोर्खालीले आइसीसी सचिव पदमा उम्मेदवारी घोषणा गरेका छन् ।
जापानबाट कतार पुगेका शेरचनसँगै गुरुङ र गोर्खाली अहिले मलेसिया पुगेका छन् । नेपाली श्रमिकको प्रमुख गन्तब्य मुलुक मलेसियामा रहेका नेपालीहरुको अवस्थाको अध्ययनका साथै एनआरएनएका डेलिगेट्ससँगको छलफल गरेका छन् ।
मलेसियाबाट हङकङ हुँदै थाइल्याण्डसम्म पुगेर स्वदेश फर्कने उनीहरुको कार्यक्रम रहेको छ । त्यहाँ रहँदा एनआरएनएका पदाधिकारी तथा अन्य नेपालीहरुसँग भेटघाट गरी त्यहाँबाट समर्थन बटुल्ने र आफ्ना प्रतिवद्धता सुनाउने उनीहरुको भनाई छ ।
जापानमा सफल व्यवसायीको पहिचान बनाएका शेरचन एनआरएनएमा गफ होइन काम गरेर देखाउन आफु उपाध्यक्षमा आएको बताउँछन् । एनआरएनए अभियानमा लोकप्रिय बनिरहेका शेरचन सबैका रोजाईमा परिरहेका छन् ।
कतारमा कर्मथलो बनाएका गुरुङ एनआरएनएको बर्तमान सचिव हुन् । व्यवसायिकरुपमा सफलता चुमेका गुरुङ आगामी कार्यकालका लागि समर्थन बटुल्न पहिलादेखि नै सक्रिय भएर लागि रहेका छन् ।
यूएईमा कर्मथलो बनाएका गोर्खाली वर्तमान कार्यसमितिको मध्यपुर्व संयोजक रहेका छन् । एनआरएनए अभियानमा सक्रिय गोर्खाली सबैमा चिरपरिचित छन् ।