रक्तदानसहित हङकङमा नेपाली नयाँ वर्ष २०८३ भव्य रूपमा मनाइयो

हङकङ । “रक्तदान गरौँ, जीवन बचाऔँ” भन्ने सन्देशसहित हङकङमा नेपाली नयाँ वर्ष २०८३ विशेष कार्यक्रम आयोजना गरी मनाइएको छ। गैरआवासीय नेपाली संघ (एनआरएनए) राष्ट्रिय समन्वय परिषद् हङकङको युवा फोरम तथा एचकेआरसीबीटीएस हङकङको संयुक्त आयोजनामा सम्पन्न उक्त कार्यक्रममा करिब ४० जनाले रक्तदान गरेका छन्।

कार्यक्रममा हङकङस्थित नेपाली समुदायको उत्साहजनक सहभागिता देखिएको थियो। सामाजिक उत्तरदायित्व र मानव सेवाको भावनालाई केन्द्रमा राखेर आयोजना गरिएको रक्तदान कार्यक्रमले समुदायमा सकारात्मक सन्देश प्रवाह गरेको आयोजकले जनाएको छ।

एनआरएनए एनसिसी हङकङकी अध्यक्ष अनु राईले मानव जीवन बचाउने कार्यभन्दा ठूलो सेवा अरू कुनै नभएको उल्लेख गर्दै युवाहरूलाई यस्ता सामाजिक अभियानमा सक्रिय रूपमा सहभागी हुन आग्रह गरिन् ।
उनले भनिन्, “रक्तदान जीवनदान हो। नेपाली समुदाय एकताबद्ध भई समाजसेवामा अघि बढिरहेको देख्दा अत्यन्त खुशी लागेको छ।”

यसैगरी, एनआरएनए आईसीसी महिला उपाध्यक्ष टिका गुरुङले विदेशमा रहेर पनि नेपाली समुदायले सामाजिक सेवामा देखाएको सक्रियता प्रशंसनीय रहेको बताइन्। उनले भनिन्, “यस्ता कार्यक्रमहरूले नेपाली समुदायबीच सहकार्य, एकता र मानवताको भावना अझ मजबुत बनाउँछन्।”

कार्यक्रममा डिस्ट्रिक्ट काउन्सिलर अरुणा गुरुङ, हङकङ नेपाली महासंघकी पूर्वअध्यक्ष रिता गुरुङलगायत विभिन्न संघसंस्थाका प्रतिनिधिहरूको उपस्थिति रहेको थियो। आयोजकले कार्यक्रम सफल बनाउन सहयोग गर्ने सम्पूर्ण व्यक्ति तथा संस्थाप्रति आभार व्यक्त गरेको छ।

गैरआवासीय नेपाली संघ हङकङले आगामी दिनहरूमा पनि यस्ता सामाजिक तथा मानवीय सेवामूलक कार्यक्रमलाई निरन्तरता दिने प्रतिबद्धता जनाएको छ।