सिन्धुपाल्चोक अन्तर्राष्ट्रिय समाजको नयाँ बर्ष शुभकामना तथा भित्तेपात्रो विमोचन

• रोजगारमञ्च
• बैशाख ७, २०८०
• 0

सिन्धुपाल्चोक अन्तर्राष्ट्रिय समाजले नयाँ बर्ष २०८० सालको शुभकामना आदानप्रदानसँगै भित्तेपात्रो विमोचन तथा संस्था परिचय कार्यक्रम सम्पन्न गरेको छ । बागमती प्रदेश सभाका सदस्य सरल सहयात्रीको प्रमुख आतिथ्यता तथा समाजका अध्यक्ष हरिकृष्ण न्यौपानेको सभापतित्वमा काठमाण्डौ र भर्चुअल माध्यमबाट गत बुधवार आयोजना गरिएको थियो ।

‘हाम्रो सिन्धुपाल्चोक हाम्रो सान, सुन्दर समाज निर्माणमा सामूहिक अभियान’ नाराका साथ स्थापित समाजका महासचिव उत्सव खड्काले स्वागत मन्तब्य राखेका थिए । संस्था दर्ता पूर्वनै बिभिन्न देशमा रहेका सिन्धुपाल्चोक वासीले गरेका सहयोग अभियानहरु र संस्था गठनका बारे अध्यक्ष न्यौपानेले प्रष्ट्याएका थिए ।

सलाईका काँटीले डँडेलो सल्काए जस्तै समाजले साना साना कामबाट सकारात्मक कर्म गर्न सकोस भन्दै नेपाल पत्रकार महासंघ सिन्धुपाल्चोकका अध्यक्ष जीवन श्रेष्ठले शुभकामना सन्देश दिएका थिए । कलाकार घमेश दुलालले सिन्धुपाल्चोकका कलाकारहरूले समाजसँग हातेमालो गर्न कुनै कसरत नराख्ने भन्दै शुभकामना व्यक्त गरेका थिए । शुभकामना मन्तव्य व्यक्त गर्दै सिन्धुपाल्चोक उद्योग वाणिज्य संघका महासचिव शम्भु तिमल्सिनाले समाजसँग हातेमालो गर्दै सामाजिक उत्तरदायित्व निर्वाहमा लागि रहने बताए ।

त्यसै गरी पूर्व स्ववियु अध्यक्ष प्रदिप पौडेलले समाजको अभियानमा सहकार्यका लागी सधैँ तत्पर रहेको र रहिरहने बताए । एआरएनए कुवेतका उपाध्यक्ष नवराज पराजुलीले देशविदेशमा रहेका सबै सिन्धुवासीलाई जोडेर अगाडि बढ्न समाजलाई सुझाब दिए ।

कंगारु एजुकेसन फाउन्डेसनका महेश बाबु तिमल्सीनाले विदेश रहरको शहर बन्नु पर्ने र वैदेशिक यात्राले दुःख मात्र होइन शेष घले जस्ता ठूला व्यवसायिक व्यक्तित्व उत्पादन गरेको उदाहरण दिदै सीप र शिक्षाले अगाडि बढ्न सहयोग गर्ने बताए ।

विषेश अतिथिको रुपमा सम्बोधन गर्दै सुनकोशी गाउपालिका प्रमुख टपेन्द्र तिमल्सिनाले स्थानीय निकायले जनचाहना अनुरूप काम गर्न राजनैतिक पार्टीहरू सङ्लिएर एक हुनु पर्ने बताउँदै हरेक कुरामा राजनीति नगर्न सुझाब दिदै समाजसँग मिलेर विदेशबाट फर्किएकालाई पुर्नस्थापनाको लागी काम गर्ने बताए । त्यसै गरी वैदेशिक रोजगार बोर्ड सचिवालयका पूर्व कार्यकारी निर्देशक राजन श्रेष्ठले सिन्धुपाल्चोक अन्तराष्ट्रिय समाजले विदेश जानु पूर्व, विदेशमा रहदाँ र विदेशबाट फर्किए पछिको तीनवटै चरणमा सुरक्षित रहनका लागी सचेतनाका कार्यक्रम ल्याउनु पर्ने बताए ।

उनले नेपाल सरकारको डाटा हेर्दा सिन्धुपाल्चोक जिल्ला सबै भन्दा बढि महिला कामदार बाहिरिने जिल्ला बनेको र सम्बन्धित स्थानीय निकायले उनीहरूलाई कसरी सुरक्षित रुपमा वैदेशिक रोजगारमा पठाउने बारे काम गर्नु पर्ने बताए । उनले विगत १० वर्षको डाटा हेर्दा करिव ३६ लाख नेपाली विदेशिएका, करिब १० हजारको विदेशमै मृत्यु भएको, धेरैको अंगभंग भएको बताए ।वैदेशिक रोजगारीबाट आउने रेमिटेन्सले मुलुक चलेको बताउँदै सीप सिकेर विदेश गए अझ आम्दानी हुने तिर जोड दिए ।

प्रमुख अतिथिको रुपमा बोल्दै बाग्मती प्रदेश सभाका सदस्य माननीय सरल सहयात्रीले राहत भन्दा पनि दिर्घकालिन काम गर्न सुझाब दिए । उनले केही ब्यक्तिले काठमाण्डौंबाट पजेरो चढेर २ बोरा चामल राहत लिएको उदाहरण दिदै भने राहत भन्दा सचेतना बाढ्न अनुरोध गरे ।

उनले सिन्धुपाल्चोकका १२ वटै स्थानीय निकायका प्रतिनिधि र निर्वाचत सभासदहरुलाई एकै स्थानमा राखी सिन्धु बिकासका लागी छलफल गराउन समाजलाई सचेत गराए । उनले सिन्धुपाल्चोकबाट कर्णाली पुगेर वा विदेश पुगेर काम गर्नु एकै भएकोले विदेश जानु अपराध होइन तर हामी मिलेर त्यसलाइ ब्यबस्थित र सुरक्षीत बनाउनु पर्ने तर्फ सोच्नु पर्ने बताए । साथै नेपालका हरेक स्थानीय निकायले आफ्नो ठाउँबाट को कति विदेश गए डाटा राख्नु पर्ने र गाँउ स्तरमै सुरक्षीत रोजगारीको ग्यारेन्टीका लागी श्रमबैंक स्थापना गर्नु पर्ने बताए ।

कार्यक्रमको अन्तिममा कार्य समितीलाइ परिचत गराउदै संस्था परिचय गराइएको थियो । कार्यक्रमको समापन गर्दै सिन्धु बिकासका लागी सबैलाइ हातेमालो गर्न र देश–विदेशबाट सिन्धुपाल्चोक वासीलाइ समाजमा जोडिन समाजका अध्यक्ष हरिकृष्ण न्यौपानेले आग्रह गरे ।

समाजका सचिब तथा संचारकर्मी हरि दुलालले सञ्चालन गरेको उक्त कार्यक्रममा सिन्धुपाल्चोकका बिभिन्न राजनितिक पार्टीका प्रतिनिधीहरु, स्थानीय निकायका जनप्रतिनिधी, कलाकार, पत्रकार लगाएत सिन्धुपाल्चोक वासीको उपस्थिती रहेको थियो ।