काठमाडौं । मधेश केन्द्रित दलसहित सात राजनीतिक दलले संयुक्त रूपमा ‘अग्रगामी मोर्चा’ घोषणा गरेका छन् ।
काठमाडौंको थापागाँउस्थित ब्यांक्वेटमा आयोजित कार्यक्रममा जनता समाजवादी पार्टी (जसपा) नेपालसहित सात दलले मोर्चा घोषणा गरेका हुन् ।
मोर्चामा जसपा नेपाल, जनमत पार्टी, आम जनता पार्टी, प्रगतिशील लोकतान्त्रिक पार्टी, नागरिक उन्मुक्ति पार्टी नेपाल, नेपाल सङ्घीय समाजवादी पार्टी र बहुजन एकता पार्टी नेपाल सहभागी छन् ।
मोर्चामा तत्कालीन नेकपा (माओवादी केन्द्र) का उपमहासचिव जनार्दन शर्मा र राष्ट्रिय स्वतन्त्र पार्टी (रास्वपा) छाडेका सन्तोष परियार आबद्ध प्रगतिशील लोकतान्त्रिक पार्टी पनि सहभागी भएको छ ।
जनमत पार्टीका अध्यक्ष डा.सीके राउतले देश अराजकताको युगतर्फ प्रवेश गर्न लागेको हो कि भन्ने प्रश्न उठाउँदै जनतामा आशा र भरोसा जगाउन विभिन्न राजनीतिक दल तथा शक्तिहरू मिलेर अग्रगामी मोर्चा घोषणा गरिएको बताएका छन् ।
अग्रगामी मोर्चा घोषणा सभा समारोहलाई सम्बोधन गर्दै राउतले देशमा जिम्मेवारीबोध भएका नेतृत्वको आवश्यकता रहेको बताए । जनताले आशा र भरोसा गरिरहेको अवस्थामा विभिन्न दल तथा पार्टीहरू एकजुट भएर मोर्चा घोषणा गर्नु ऐतिहासिक परिघटना भएको उनको भनाइ थियो ।
‘देश अराजकताको युगतर्फ प्रवेश गर्न लागेको हो कि भन्ने प्रश्न उठिरहेको छ । यस्तो अवस्थामा जनतामा आशा र भरोसा जगाउन विभिन्न राजनीतिक दल तथा शक्तिहरू एकजुट भएर अग्रगामी मोर्चा घोषणा गरेका छौं । जनताले आशा र भरोसा गरिरहेको बेला विभिन्न दलहरू मिलेर मोर्चा घोषणा गर्नु आफैंमा ऐतिहासिक परिघटना हो ।’
उनले प्रजातान्त्रिक आन्दोलनदेखि समाजवादी आन्दोलनसम्म योगदान दिएका विभिन्न विचारधारा र पृष्ठभूमिका राजनीतिक योद्धाहरू मोर्चामा एकीकृत भएको बताए । लोकतान्त्रिक, सामाजिक लोकतान्त्रिक तथा क्रान्तिकारी विचारधारालाई एक ठाउँमा ल्याएर जनताको आशामा खरो उत्रने उद्देश्यले मोर्चा गठन गरिएको उनले स्पष्ट पारे ।
राउतले अग्रगामी मोर्चा कुनै एक जात, समुदाय वा वर्ग विशेषको नभई सम्पूर्ण नेपाली जनताको भएको दाबी गरे । ‘हामी यहाँ सबै देशको हितका लागि, जनताको आशा पूरा गर्नका लागि जम्मा भएका छौं,’ उनले भने, ‘सम्पूर्ण नेपाली जनता, सबै जातजाति, समुदाय र वर्गको मोर्चा हो ।’
विगतमा पार्टी तथा राजनीतिक मोर्चा सञ्चालनका क्रममा आफूहरूबाट कमजोरी भएको हुनसक्ने स्वीकार गर्दै राउतले त्यसको समीक्षा गरी आगामी दिनमा सुधारसहित अघि बढ्नुपर्ने बताए ।
पार्टी सञ्चालन, जनतामाझ जाने तथा सरकार सञ्चालनका क्रममा भएका कमीकमजोरीलाई सच्याउँदै नयाँ प्रतिबद्धताका साथ अघि बढ्नुपर्ने उनको भनाइ थियो ।
उनले अग्रगामी मोर्चा सत्ता प्राप्ति वा कुर्सी खोस्ने उद्देश्यले गठन नगरिएको समेत स्पष्ट पारे । ‘कुर्सी खोस्नका लागि यो मोर्चा बनेको होइन,’ उनले भने, ‘कुर्सीमा बस्नुस्, तर संविधानअनुसार चल्नुस् ।’
