वैदेशिक रोजगार व्यवसायीहरूको व्यापक उपस्थितिमा वैदेशिक रोजगार व्यवसायी गणतान्त्रिक मञ्चले भक्तपुरको घ्याम्पेडाँडामा वनभोज कार्यक्रम सम्पन्न गरेको छ ।
मञ्चका अध्यक्ष धनलाल जैसीको अध्यक्षतामा सम्पन्न कार्यक्रममा गणतन्त्रिक मञ्चका इञ्चार्ज, नेकपा माओबादीका केन्द्रीय सदस्य तथा पूर्वमन्त्री रामेश्वर राय यादवले मञ्चले आयोजना गरेको वनभोज कार्यक्रमले मनोरञ्जन, आपसमा भाइचारा सम्बन्ध र सद्भाव कायम गर्ने भन्दै आयोजक मञ्चलाई धन्यवाद दिए ।
नेपाल वैदेशिक रोजगार व्यवसायी संघका अध्यक्ष राजेन्द्र भण्डारीले संघले व्यवसायीका समस्या समाधानका लागि काम गरिरहेको भन्दै व्यवसायीका सबै संघसंस्थाबीच आपसी एकता बलियो हुनुपर्ने बताए । मञ्चका अध्यक्ष जैसीले मञ्च व्यवसायीका हक अधिकारका मुद्दामा सधैं उभिने, तर संघले बाटो बिराए खबरदारी गर्ने बताए ।
कार्यक्रममा संघका पूर्वअध्यक्ष दिल प्रसाद पोखरेल, प्रेमबहादुर कटुवाल, नेपाली कांग्रेसकी केन्द्रीय सदस्य तथा महिला व्यवसायी सिता देवकोटा, प्रगतिशील वैदेशिक रोजगार व्यवसायी मञ्च नेपालका अध्यक्ष जनक रावल, वैदेशिक रोजगार व्यवसायी एकता समितिका अध्यक्ष हरि बहादुर पाण्डे क्षेत्री, नेपाल लोकतान्त्रिक वैदेशिक रोजगार व्यवसायी एशोसिएसनका पूर्वअध्यक्ष नरेन्द्र ढकाल, संघका कार्यसमितिका पदाधिकारी तथा सदस्यहरू, एशोसिएसन तथा मञ्चका वर्तमान पदाधिकारीहरु, पत्रकारहरुका साथै करिब ४ सय जनाको हाराहारीमा उपस्थिति रहेको वनभोज कार्यक्रमका संयोजक केदारनाथ अधिकारीले जानकारी दिए ।
