थाइल्याण्डका कोरोना प्रभावितलाई थाइ नेपाली संघको सहयोग

रोजगारमञ्च
असार ५, २०७७
0

थाइ नेपाली संघ, दुःख निवारण विभागको अग्रसरतामा थाइल्याण्डका विभिन्न शहरहरूमा कोरोना भाईरसका कारण आपत्ति परेका नेपाली र गोर्खाली एवं जनजाती समुदायमा राहत वितरण गरिएको छ । थाइ नेपाली संघका विभिन्न शाखाहरुले सक्रियतामा राहत संकलन साथै वितरण गरेका हुन् ।

कोभिड १९ का कारण नियमित काम नभएपछि आर्थिक रुपले अप्ठ्यारोमा परेका समुदायलाई यस्तो राहत वितरण गरिएको थाइ नेपाली संघका अध्यक्ष कुमार कार्कीले जानकारी दिए ।

राहत सामग्रीहरुमा चामल, तेल, चाउचाउ, माछाका डब्बा, पिठो, नुन, मसला जस्ता दैनिक उपभोग्य सामग्रीहरु थिए । आवश्यकता अनुसार केही व्यक्तिहरुलाई आर्थिक सहयोग पनि गरिएको जनाइएको छ । शाखाहरू नभएका ठाउँबाट पनि राहत सामाग्री माग भएको अवस्थामा थाइ नेपाली संघका प्रतिनिधिहरू गएर राहत वितरण गरेको अध्यक्ष कार्कीको भनाई छ ।

गत मे महिनामा थाइ नेपाली संघबाट भएको राहत वितरणबाट २५ सय ८ परिवारका ८ हजार ६ सय ८५ व्यक्तिहरुले सेवा पाएका छन् । थाइ नेपाली संघका शाखा तथा उपशाखाहरूमा अवश्यकता अनुसार विहान वेलुका खानाहरू बनाइ दैनिक रूपमा ४ सय भन्दा धेरै मानिसहरूलाई वितरण गरिएको संघले जानकारी दिएको छ ।
संघले महामारी समयमा रक्तदान कार्य पनि गरेको छ । विविध रोग उपचारका कारण अस्पतालमा भर्ना भएका साथै भर्ना हुन अप्ठ्यारो भएका र उपचार पश्चात आर्थिक अभावका कारणले अप्ठ्यारोमा परेका परिवारहरुलाई पनि दुःख निवारणले सहयोग गरेको बताइएको छ ।

यसैगरी कोभिडको महामारीले समस्यामा परेका नेपालबाट अध्ययनका लागि आएका ५६ नेपाली विद्यार्थीहरुलाई पनि अन्य संस्था तथा नेपाली राजदुतावाससँग मिलेर राहतको कार्यमा सहयोग गरिएको अध्यक्ष कार्कीले जानकारी दिए ।

थाइल्याण्डबाट विदेश फर्कन चाहनेहरूलाई पनि सरकारी निकायहरूबाट कागजपत्र लगायत आवश्यकता अनुसार यातायात सुविधा मिलाउने कार्यमा संघले सहयोग गर्दै आएको छ । संघले कोभिडको महामारीले ग्रस्त भएको बेला पनि संघको दुःख निवारण विभागको सक्रियता भने थाइल्याण्ड देशभर सुचारु रहेको छ ।

आफूले सुरक्षाका विधि अपनाएर संघको दुःख निवारण विभागका प्रमुख, सदस्यहरु र सिंगो थाइ नेपाली संघको टीम राहतका कार्यहरुमा सरिक भएको थियो ।

संघका महासचिव विनोद लामिछाने र दुःख निवारण विभागका प्रमुख रामकुमार ढुंगानाले संघका विभिन्न शाखाका पदाधिकारी तथा विभिन्न व्यक्तिहरुको सहयोगले गर्दा राहतका कामहरु गर्न सकिएको बताएका छन् ।