एसिसी प्रिमियर कप : साउदी ६ विकेटले पराजित, समूह चरणमा अपराजित रहदै नेपाल सेमिफाइनलमा
- बैशाख ५, २०८१
- 0
ओमानमा जारी एसीसी पुरुष प्रिमियर कप क्रिकेट प्रतियोगिताको समूहगत चरणको आफ्नो अन्तिम खेलमा नेपालले साउदी अरेबियालाई ६ विकेटले हराएको छ । प्रतियोगितामा नेपालको यो लगातार चौथो जित हो । समूह ए बाट सबै ४ खेलमा जित निकालेको नेपाल समूह चरणमा अपराजित रहदै सेमिफाइनलमा पुगेको हो ।
बुधबार ओमानको अल अमरतमा साउदीले दिएको ७४ रनको लक्ष्य नेपालले ४ बल खेल्न बाँकी छदा ४ विकेट गुमाएर पार गर्यो।
नेपालका लागि गुल्सन झाले नटआउट ३२ रन बनाए भने कप्तान रोहितकुमार पौडेलले १६ रन बनाए । त्यसअघि ओपनरद्वय कुशल भुर्तेल शून्य र आसिफ शेख २ रनमा आउट भए भने कुशल मल्ल पनि २ रनमै आउट भएका थिए । यसपछि ब्याटिङमा आएका दीपेन्द्रसिंह ऐरीले १७ रन जोडे।
वर्षाका कारण मैदान हिलो हुँदा ८ ओभरमा झारिएको खेलमा टस जितेको नेपालले फिल्डिङ रोजेपछि पहिले ब्याटिङ गरेको साउदीले ७ विकेटको क्षतिमा ७३ जोड्यो।
साउदीका लागि अब्दुल वाहीदले सबैभन्दा बढि ३७ रन जोडे। अरु ब्याटरले दोहोरो अंकमा रन जोड्न सकेनन्।
बलिङमा नेपालका करण केसी र अभिनास बोहराले २-२ विकेट लिए। ललित राजवंशी र प्रतिश जिसीले १-१ विकेट हात पारे।
नेपाल एक खेल बाँकी छँदै समूह विजेता बनेको थियो। नेपालसँग पराजित भएपछि साउदी भने बाहिरिएको छ। नेपालको जितले यस समूहमा हङकङ समूह उपविजेता बनेर अन्तिम चारमा पुग्यो।