सरकारले सुरक्षण मुद्रण केन्द्रको कार्यकारी निर्देशकमा देवराज ढुंगाना (मोरङ) लाई पुनः नियुक्त गरेको छ भने गोरखापत्र संस्थानको महाप्रबन्धकमा हिक्मतबहादुर रावल (कैलाली) लाई नियुक्त गर्ने निर्णय गरेको छ।
बिहीबार बसेको मन्त्रिपरिषद् बैठकले दुवै नियुक्तिलाई स्वीकृति दिएको हो।
सुरक्षण मुद्रण केन्द्रका कार्यकारी निर्देशक ढुंगाना यसअघि पनि सोही पदमा कार्यरत थिए। सरकार परिवर्तनसँगै विभिन्न सार्वजनिक संस्थानका राजनीतिक नियुक्ति खारेज हुँदा उनी पदमुक्त भएका थिए। कार्यकालका क्रममा उनले सवारी चालक अनुमतिपत्र (लाइसेन्स) लगायत विभिन्न सुरक्षण मुद्रणसम्बन्धी महत्वपूर्ण परियोजनाको नेतृत्व गरेका थिए। सुरक्षण मुद्रणका क्षेत्रमा उनको अनुभव र सुरु गरिएका योजनालाई निरन्तरता दिनुपर्ने आवश्यकता रहेको चर्चा भइरहेका बेला सरकारले उनलाई पुनः सोही जिम्मेवारी दिएको हो।
यता, गोरखापत्र संस्थानको महाप्रबन्धकमा नियुक्त भएका हिक्मतबहादुर रावल लामो समयदेखि मोफसलमा टेलिभिजन पत्रकारितामा सक्रिय रहँदै आएका पत्रकार हुन्। उनको नियुक्तिसँगै गोरखापत्र संस्थानले नयाँ नेतृत्व पाएको छ।
यसअघि गोरखापत्र संस्थानका अध्यक्ष अखण्ड भण्डारीको नियुक्ति खारेज भएको थियो भने महाप्रबन्धक लाल ऐरीको कार्यकाल समाप्त भएपछि उक्त पद रिक्त रहेको थियो। रिक्त रहेको महाप्रबन्धक पदमा मन्त्रिपरिषद्ले रावललाई नियुक्त गर्ने निर्णय गरेको हो।
रावलको नियुक्तिपछि उनको व्यवस्थापकीय क्षमता र संस्थान सञ्चालनको अनुभवलाई लिएर सञ्चार क्षेत्रमा विभिन्न टिप्पणी र अपेक्षाहरू व्यक्त हुन थालेका छन्। उनी पत्रकारिताको पृष्ठभूमिबाट आएकाले संस्थागत नेतृत्वलाई कसरी प्रभावकारी ढंगले अघि बढाउँछन् भन्ने विषयलाई धेरैले चासोका साथ हेरेका छन्।
सरकारले भने दुवै नियुक्तिमार्फत सम्बन्धित संस्थामा नेतृत्वको निरन्तरता र कार्यसम्पादनलाई प्रभावकारी बनाउने अपेक्षा गरेको जनाएको छ।
