कोभिड–१९ को महामारीका कारण समस्यामा परेका ७० बिपन्न परिवारलाई लायन्स क्लब अन्तर्राष्ट्रिय ‘ए टु’ ले राहत सामाग्री वितरण गरेको छ ।
लायन्स क्लबकी डिस्ट्रिक गभर्नर डा. सुशिला मल्लको उपस्थितिमा सोमबार भक्तपुर बालकोटमा बस्ने विपन्न परिवारलाई राहत सामाग्री वितरण गरेको हो ।
राहतमा १२ केजी चामल, एक केजी दाल, एक केजी नुन, आधा केजी चिनी, आधा लिटर खानेतेल, आधा केजी न्यूट्रेला र २ वटा हात धुने सामुन वितरण गरिएको चिफ एरिया को–अर्डिनेटर गोपाल पौड्यालले जानकारी दिए ।
सामाजिक दुरी कायमगरी वितरण गरिएको राहत सामाग्री पाएपछि कुमार दर्जीले अव केही दिन भोकै बस्न नपर्ने भयो भन्दै दातालाई धन्यवाद दिए । कोभिड र लकडाउनले काम र दाम गुमाएका अधिकांशले लायन्सको राहत पाएका छन् ।
राहत वितरण कार्यक्रमलाई डिस्ट्रिक गभर्नर डा.मल्लले खान नपाएर कोही मर्न नपरोस्, यदि कसैको चुलो बलेन भने लायन्स उनीहरुको चुलो बाल्न तयार रहेको बताइन् । साथै डा. मल्लले समाजमा अप्ठेरो अवस्थामा रहेका कोही भए लायन्सको सम्पर्कमा आउन आग्रह पनि गरिन् ।
स्थानीय पूर्वेली टोल समितिका सचिव यज्ञराज घिमिरेले लायन्सको कार्यको प्रसंशा गर्दै आफ्नो टोलमा आएर विपन्न वर्गलाई सहयोग गरेकामा क्लबप्रति आभार प्रकट गरे ।
कार्यक्रममा लायन्स ‘क्लस्टर चिफ’ फडिन्द्र पौडेल, डिस्ट्रिक सेक्रेटरी उत्तम झा, ट्रेजरर् डा. कमल कायस्थ, लायन चन्द्र ढकाललगायत लायन्स लिडरहरुको उपस्थिति रहेको थियो ।
लायन्स क्बल अन्तर्र्राष्ट्रिय ए टु ले कोभिड–१९ को महामारीका कारण समस्यामा परेका विपन्न वर्गका मानिसहरुका लागि कार्यक्रम संचालन गर्दै आएको छ । उक्त कार्यक्रम अन्तर्गत ‘फुड बैंक’ को स्थापना गरि करिब पाँच हजार परिवारलाई राहत उपलब्ध गराइने जनाइएको छ । ६ वटा क्लस्टर अन्तर्गत अलग अलग स्थानमा यस्तो राहत वितरण कार्यक्रम भइरहेको लायन्सले जनाएको छ ।
