गुल्मीको मुसिकोटमा बन्दै गरेको पुल भत्कियो, पाँच जना घाइते
- बैशाख २, २०७६
- 0
गुल्मीको मुसिकोट नगरपालिकामा बन्दै गरेको पुल भत्किएको छ । शनिबारदेखि ढलान थालिएको पुल आइतबार ढलान गर्दागर्दै भत्किएको हो ।
नगरपालिकाको बडागाउँ र वामीटक्सार बजार जोड्ने पुल भत्किएको छ । पुल भत्किदा ठेकदारसहित पाँच जना मजदुर घाइते भएका छन् ।
प्रदेश ५ सरकारले विनियोजन गरेको बजेटबाट पूर्वाधार विकास कार्यालय गुल्मीमार्फत् उक्त पुल निर्माण गर्न लागिएको थियो ।
५८ मिटर लामो पुलकोबीच भागमा पिलर उठाइएको छैन । ओभरलोडका कारण पुल भत्किएको हुन सक्ने मुसिकोट नगरपालिकाका नगर प्रमुख सोमनाथ सापकोटाले जानकारी दिए ।
पुल निर्माणका लागि करिब पाँच करोड बजेट विनियोजन गरिएको साविकको जिल्ला प्राविधिक कार्यालयका इन्जिनियर पारस पन्थीले जानकारी दिए ।
उनका अनुसार उक्त पुल बीचमा पिलर राख्न नपर्ने प्रिटेस्ट डिजाइनको छ । दरमखोलामा पानीको सतह बढेर पुलमुनी राखिएको टेका भासिएकाले पुल भत्किएको हुन सक्ने पन्थीको अनुमान छ। पुल निर्माणको जिम्मा वाईपी जयबुद्ध निर्माण कम्पनी काठमाडौंले लिएको छ ।