गत चैत्र १७ गते आएको अकल्पनिय तथा भिषण आधीहुरीबाट प्रभावित बारा जिल्लाको विभिन्न गाँउमा पुगी युथ फर हयुमन राइट्स नेपालले सहयोग प्रदान गरेको छ । युथ फर हयुमन राइटससँगै नेपाल स्काउट बारा र साइन्ट्रोलोजी भोल्युनटर मिनिस्टर नेपालले आफ्ना १५ जना भन्दा बढी स्वयंसेवक परिचालन गरी सहायता उपलब्ध गराएको हो ।
उक्त राहत सहायता कार्यक्रमको संयोजन युथ फर हयुमन राइट्स नेपालका मानव अधिकारकर्मी गुण राज प्याकुरेलले गरेका थिए भने स्थानीय संयोजन नेपाल स्काउट बारा जिल्ला कार्यलयका आयुक्त भरत शाहले गरेका थिए ।
टोलीले राहत पाउन नसकेका विकट बस्तीहरुसम्म पुगेर करिब १७५ घर परिवारलाई आवश्यक लत्ताकपडा, खाद्यान्न, औषधी उपचारलगायतको व्यवस्था गरेको युथ फर हयुमन राइट्स नेपालका प्याकुरेलले जानकारी दिए ।
सहयोगका लागि प्रभावितस्थल पुगेको स्वयंसेवीहरुको टोलीमा प्याकुरेलसँगै विनोद शर्मा, विवेक पाठक, अनुज प्रधान, त्रिषा श्रेष्ठ, अर्पणा ओझा, डा. तेन्जी डोल्मा मुगुमका साथै भोल्युन्टर मिनिष्टरबाट ३ जना गएका थिए । स्वयंसेवीहरुलाई यातायातको व्यवस्थासहित ३ जना स्वयंसेवी नयाँ बानेश्वरस्थित काव्य स्कुलले उपलब्ध गराएको थियो ।
साइन्ट्रोलोजी भोल्युनटर मिनिस्टर नेपालले यस अघि विनाशकारी भुकम्पको समयमा प्रभावित सबै जल्लामा पुगेर १७ वटा अस्थायी टहरा निर्माण गरेको र सम्पूर्ण जिल्लामा विपत व्यवस्थापन राहत तथा उपलब्ध गराउने कार्य गरेको बताउदै साइन्ट्रोलोजी भोल्युनटर मिनिस्टरका प्रविन गिरीले विपतीको समयमा देश विदेश पुगेर सहायतामा जुटने गरेको जनाए ।
