वैदेशिक रोजगार विभागले ५ सय ८४ मेनपावर कम्पनीको कारोवार रोक्का गरेको छ ।
विभागले सोमवार एक सुचना जारी गर्दै ५ सय ५४ मेनपावरको कारोवार रोक्का गरेको जानकारी दिएको हो । यी मेनपावरमध्ये कति वटा खारेज गरेको हो भन्ने विवरण विभागले खुलाएको छैन ।
विभागमा दर्ता भएर स्वयं खारेजीका लागि निवेदन दिएका, विभागले आफैले नियम विपरित काम गरेका मेनपावरको खारेज गरेका र उजुरी परेर समस्या समाधान नगरेका मेनपावरहरुको कारोवार रोक्का गरेको संख्या ५८४ भएको विभागले जनाएको छ ।
विभागले अहिलेसम्म दर्ता भएर खारेजीमा परेका र काम कारवाही रोक्का भएका मेनपावरहरुको सूची निकालेको वैदेशिक रोजगार व्यवसायी संघका महासचिव मेघनाथ भुर्तेलले जानकारी दिए ।
सरकारले वैदेशिक रोजगार ऐन २०६४ संशोधन गर्दै मेनपावर कम्पनीको धरौटी बढाएपछि केही मेनपावर मर्ज भएका थिए भने केही आफै खारेजीमा परेका थिए ।
यसअघि सबै मेनपावर कम्पनीको धरौटी ७ लाख नगद र २३ लाख बैंक ग्यारेन्टी रहेको थियो । तर अहिले ३ हजारसम्म पठाउनेलाई २ करोड, ५ हजारसम्म पठाउनेलाई चार करोड र त्यसभन्दा बढी पठाउनेलाई ६ करोड धरौटी राख्नु पर्ने व्यवस्था गरिएको छ । ऐन संसोधनमा एकाघरका व्यक्तिका नाममा एउटाभन्दा बढी मेनपावर सञ्चालन गर्न नपाइने र मर्जरमा जान सक्ने विकल्प दिएका कारण मेनपावर कम्पनीको संख्या घटेको संघका महासचिव भुर्तेलको भनाई छ ।
यस्तै विभागले असार १७ गते एक सुचना प्रकाशन गरी सबै मेनपावर कम्पनीहरुलाई फ्रि भिसा फ्रि टिकटमा पठाएको कामदारहरुको विवरण माग गरेको छ ।
यसैबीच वैदेशिक रोजगार ऐनको प्रावधान अनुसार बार्षिक १ सय कामदार वैदेशिक रोजगारीमा पठाउन नसक्ने मेनपावर नविकरण नहुने हुदा ३ सय भन्दा बढी मेनपावर कम्पनी खारेजीको त्रासमा परेका छन ।
यसअघि विगत ४ वर्षदेखि बाधा अड्काउ फुकाउमार्फत नवीकरण हुँदै आएको थियो । व्यवसायीहरूले १०० कामदारको प्रावधान हटाउनुपर्ने माग राख्दै आएका छन् । सरकारले सोही आधारमा ऐन संशोधनको प्रक्रिया अगाडि बढाए पनि अहिलेसम्म यो संसोधन हुन सकेको छैन ।
प्रत्येक आर्थिक वर्षको असार मसान्तभित्र मेनपावर कम्पनीको इजाजतपत्र नवीकरण गर्नुपर्ने व्यवस्था छ । तर यो आर्थिक वर्षको असार अन्तिमसम्म पनि बाधा अडचन फुकाउका लागि मन्त्रीपरिषदको बैठकले कुनै निर्णय गरिनसकेकाले ३ सय भन्दा बढी मेनपावर कम्पनी खारेजीको संघारमा पुगेका हुन ।
वैदेशिक रोजगार विभागमा दर्ता भई हाल खारेज भएका तथा कारोबार रोक्का भएका संस्थाहरुको नामावली
