आयल निगमको दाबी– पेट्रोलियम पदार्थको बिक्री वितरण सहज भइसक्यो

असार १७, २०८३
0

काठमाडौं । नेपाल आयल निगमले पेट्रोलियम पदार्थको बिक्री वितरणमा देखिएको समस्या समाधान भइसकेको दाबी गरेको छ ।

निगमका प्रवक्ता मनोज ठाकुरले पम्पमा तेलको मौज्दात कम भएका कारण केही समस्या देखिएको र अहिले समस्या समाधान भइसकेको बताएका हुन् ।

‘पम्पमा तेलको मौज्दात कम भएका कारण केही लाइन देखिएको हो, थानकोट डिपोबाट लोड भएर मागअनुसार तेल गइसकेको छ, कतिपयमा पुगिसके, कतिपयमा पुग्ने क्रममा छ’, ठाकुरले भने, ‘पेट्रोलियम पदार्थ बिक्री वितरणमा देखिएको समस्या समाधान भइसकेको छ, अहिले कुनै समस्या छैन ।’

उपत्यकासहित प्रमुख सहरका पम्पमा एक्कासी उपभोक्ताको चाप बढेपछि उद्योग, वाणिज्य तथा आपूर्ति मन्त्रालयको निर्देशनमा निगमले केही पम्पको अनुगमन समेत गरेको थियो ।

काठमाडौं उपत्यकाका पम्पहरुले आज निगमको थानकोटस्थित डिपोबाट १३ लाख लिटर डिजेल र १३ लाख लिटर पेट्रोल उठाएको प्रवक्ता ठाकुरले जानकारी दिए । उपत्यकामा १३० भन्दा बढी पम्प रहेका छन् ।