बस्नेतको अध्यक्षतामा संखुवासभा उद्योग वाणिज्य संघको ३८ सदस्यीय कार्यसमिति निर्विरोध चयन

पुस १९, २०८१
0

संखुवासभा उद्योग वाणिज्य संघ खाँदबारीको अध्यक्षमा डेगराज बस्नेत निर्विरोध चयन भएका छन् । संघको १७ औं साधारण सभा तथा अधिवेशन बाट बस्नेतको अध्यक्षतामा ३८ सदस्यीय समिति चयन भएको छ ।

मंगलबार सुरु भएको संघको साधारण सभा तथा अधिवेशन बुधबार सम्पन्न भएको हो । संघमा आंकाक्षिहरु धेरै भएपछि सहमति जुटाउन निर्वाचन प्रकृयामा समय थप गर्दै भएपनि निर्विरोध कार्यसमिति चयन गरिएको थियो । सहमति जुटाउने क्रममा केही पद समेत थप गरिएको छ ।

समितिको बरिष्ठ उपाध्यक्ष सन्जीव कुमार श्रेष्ठ(राजु), उपाध्यक्षहरु जनक पौडेली, राजकुमार श्रेष्ठ र राजिव श्रेष्ठ, महा-सचिवमा प्रविण श्रेष्ठ र उप-महासचिवमा हिमाल श्रेष्ठ चयन भएको निर्वाचन मण्डलका रमेश भट्टराईले जानकारी गराए ।

त्यसैगरी समितिको कोषाध्यक्षमा कविता श्रेष्ठ, सचिवहरु कुमार राज श्रेष्ठ र रविन्द्र खत्री, सह कोषाध्यक्ष मनोज कटुवाल र सह-सचिवमा विक्रमरत्न शाक्य चयन भएका हुन् ।

नयाँ समितिको सदस्यमा सदरमुकाम बाहिर सभापोखरी गाउँपालिकाका विकाश तामाङ समेत चयन भएका छन् भने बाँकी सबै सदरमुकाम खाँदबारीका रहेका छन् । नयाँ समितिका पदाधिकारीहरुलाई विहिबार जिल्ला समन्वय समितिको हलमा एक कार्यक्रम विच प्रमाणपत्र वितरण, बधाई तथा शुभकामना दिइएको छ ।

जिल्ला समन्वय समितिका प्रमुख सुमन शाक्यको प्रमुख आतिथ्यतामा भएको उक्त कार्यक्रम निर्वतमान अध्यक्ष कृष्णभगत प्रधानको सभापतित्वमा सम्पन्न भएको हो ।

संघको १७ औं साधारणसभा तथा अधिवेशनको उद्घाटन कार्यक्रम नेपाल उद्योग वाणिज्य महासंघका केन्द्रिय वरिष्ठ उपाध्यक्ष अन्जन कुमार श्रेष्ठको प्रमुख आतिथ्यतामा सम्पन्न भएको थियो ।
उद्घाटन कार्यक्रममा स‌ंघको केन्द्र, कोशी प्रदेशका प्रतिनिधि तथा विभिन्न जिल्लाका जिल्ला अध्यक्षहरु, कार्यालय प्रमुख तथा प्रतिनिधि, व्यवसायीहरुको उपस्थिति रहेको थियो ।