चाडपर्वलाई लक्षित वृहत जुत्ताचप्पल व्यापार मेला भृकुटीमण्डपमा शुरु

१५ प्रतिशत देखि ५० प्रतिशत सम्म छुटको व्यवस्था

भदौ ६, २०७९
0

बडादशैं तथा विभिन्न चाडपर्वहरुलाई लक्षित गरी फुट्वेयर म्यानुफ्याक्चर्स एशोसिएसन अफ नेपालले काठमाडौंको भृकुटीमण्डपमा वृहत् जुत्ताचप्पल व्यापार मेलाको सुरुवात गरेको छ ।

वागमती प्रदेश सरकारका वाणिज्य तथा आपूर्ति मन्त्री मिलनबाबु श्रेष्ठले उद्घाटन गरेसँगै आइतबारबाट मेला शुरु भएको हो । मेला भदौ २० गतेसम्म चल्ने जनाइएको छ ।

स्वदेशी उत्पादनलाई प्रवद्र्धन गर्न मेलाको माध्यमबाट व्यापक प्रचार प्रसार गरी बाह्य बजार समेत बिस्तार गर्ने उदेश्यका साथ मेला आयोजना गरेको र स्वदेशमा उत्पादित जुत्ताचप्पल, छालाका वस्तु तथा स्देशमा तयार गरिएका सामाग्रीहरु एउटै छानामुनी उपभोक्ताले एकैपटक अवलोकन तथा खरिद गर्न पाउने भएकाले मेला फलदायी हुने आयोजकको भनाई छ ।

जुत्ताचप्पल व्यापार मेलाका संयोजक तथा फुटवयर म्यानुफ्याक्चरर्स एशोसिएशन अफ नेपालका उपाध्यक्ष सुरज बञ्जाडेले वार्षिक क्यालेण्डर अनुसार चालु आर्थिक वर्षको पहिलो मेला आयोजना गरिएको बताए । उनले मेलामा १ हजारभन्दा बढी किसिमका उत्पादनको स्टल रहेको बताए ।

जुत्तामेलाको अवलोकन गर्दै कार्यक्रमका प्रमुख अतिथि तथा उद्योग वाणिज्य तथा आपूर्ति मन्त्री श्रेष्ठले जुनसुकै उत्पादित वस्तुहरु प्रदर्शन र प्रवद्र्धन गर्नको लागि मेलाको आवश्यकता रहेको बताउँदै फुट्वेयर म्यानुफ्याक्चर्स एशोसिएसन अफ नेपालले गर्ने राष्ट्रिय र अन्तराष्ट्रिय मेलाहरुमा प्रदेश सरकार सधैं साथ दिन तत्पर रहेको प्रतिवद्धता जायर गरे ।

अहिलेको अवस्थामा स्किल्ड मेनपावरको आवश्यकता रहेको र उद्योग वाणिज्य तथा आपूर्ति मन्त्रालय ट्रेनिङ दिएर स्किल्ड मेनपावर उत्पादन गर्नका लागि तयार रहेको बताउँदै मन्त्रीले ब्रान्ड डेभ्लोप गर्ने कुरामा समेत प्रदेश सरकार हरदम तयार रहेको जानकारी दिए ।

कार्यक्रमा बोल्दै उद्योग वाणिज्य महासंघका उपाध्यक्ष दिनेश श्रेष्ठले नेपाल सरकारले तयार वस्तुको भन्दा कच्चा पदार्थको कर कम लगाउने नीति बनाएर नेपालमा धेरै उद्योग आउने बताए । उनले प्रदेश सरकारहरुले पनि उत्पादनको आधारमा उद्योगहरुलाई प्रोत्साहन गर्नुपर्ने बताउँदै नेपाली उत्पादन जुत्ताचप्पल विदेशी उत्पादन भन्दा कम नभएको जिकिर गरे ।

संघका अध्यक्ष नानिराज घिमिरेले स्वदेशी उत्पादनमा आत्मर्निभर भइरहेको छालाजुत्ता क्षेत्रमा सरकारले सहयोग गरेको खण्डमा भोलिका दिनमा राज्यलाई फाइदा पुग्ने गरी उत्पादन बढाउने बताए ।

१५ प्रतिशत देखि ५० प्रतिशत सम्म छुटमा

३ सय भन्दा बढी प्रकारका जुत्ताचप्पल उपलब्ध हुने मेलामा ५ लाखभन्दा बढी ग्राहकको सहभागिता हुने अपेक्षा गरिएको छ भने १५ देखि ५० प्रतिशतसम्म छुट दिने आयोजकको भनाई रहेको छ ।

भाद्र ५ गतेदेखि भाद्र २० गतेसम्म हुने मेलामा विभिन्न १० वटा नेपाली ब्रान्डहरु बिएफ डियरहिल, कोसेली, क्रसरोड, फ्रस्ट वाक, सुजल्यान्ड, रनसुज, स्मार्ट सुज, केटिएम सुज, सिल्स सुज र ह्याप्पी सुरज रहेका छन् ।

सम्बन्धित शीर्षकहरु