वैदेशिक रोजगार व्यवसायीलाई बैंक ग्यारेन्टी सुविधाका लागि सेञ्चुरी बैंकले ल्यायो विशेष योजना

भदौ ४, २०७६
0

सेञ्चुरी कर्मशियल बैंकले बैदेशिक रोजगार व्यवसायीलाई बैंक ग्यारेन्टी सुविधा दिने विशेष योजना सार्वजनिक गरेको छ ।

बैंकले मुलुकको अर्थतन्त्रको मेरुदण्डको रुपमा रहेको र विप्रेषणसंग प्रत्यक्ष सम्बन्ध राख्ने वैदेशिक रोजगार व्यवसायीहरुलाई सुविधा दिने उद्देश्यसहित यो योजना ल्याएको जनाएको छ । हालै नेपाल सरकारले वैदेशिक रोजगार ऐन २०६४ मा गरेको संशोधन बमोजिम बैंक ग्यारेण्टी सुविधाका लागि यो योजना ल्याइएको बैंकले जनाएको छ ।

यस अन्तर्गत बैंकले ५ वर्षका लागि १ करोड ५० लाख बैंक ग्यारेन्टी जारी गर्नको लागि २० लाखको नगद मार्जिन र ४ लाखको कमिसन हुने जनाएको छ ।

साथै बैंकले विदेशी मुद्रा सटहीमा आकर्षक सुविधा दिनुको साथै वैदेशिक रोजगारमा जाने कामदारहरुको लागि विशेष खाता सुविधा पनि रहेको जानकारी गराएको छ ।

सुविधाहरुले वैदेशिक रोजगार व्यवसायीहरुलाई काम गर्न सजिलो हुनुको साथै कामदारहरुलाई समेत थप सहयोग पुग्ने विश्वास बैंकले लिएको छ ।