हेमन्त गौतमसहित पाँच पत्रकारलाई ललितकला पुरस्कार

फाल्गुन ७, २०७७
0

सोफाज–लक्ष्मीमाया कुमाले स्मृति ललितकला पत्रकारिता पुरस्कार–२०७६ बाट हेमन्त गौतम पुरस्कृत हुनुभएको छ । यस्तै, २०७७ सालको सोही पुरस्कारबाट दीपक परियार पुरस्कृत हुनुभएको छ ।

क्रोधकला शिरोमणि कालु कुमालेले स्वर्गीय पत्नी लक्ष्मीमाया कुमालेको स्मृतिमा सोफाज–लक्ष्मीमाया कुमाले स्मृति ललितकला पत्रकारिता पुरस्कार स्थापना गर्नुभएको हो ।

यसैगरी, नारायणबहादुर सिंह स्मृति ललितकला पत्रकारिता पुरस्कार–२०७६ बाट दीपक श्रेष्ठ (विहीन) र २०७७ बाट सिर्जु बज्राचार्य पुरस्कृत हुनुभएको छ । कलापत्रकारिता र कला इतिहासका अग्रणी व्यक्तित्व नारायणबहादुर सिंहको स्मृतिमा नेपाल ललितकला पत्रकार समाजले सो पुरस्कार स्थापना गरेको हो ।

यसैगरी, सोफाज ललितकला पत्रकारिता पुरस्कारबाट राधा पौडेल (अजवी) पुरस्कृत हुनुभएको छ । सबै पुरस्कारको राशि ११ हजार १११ रुपियाँको रहेको छ ।

नेपाल ललितकला प्रज्ञाप्रतिष्ठानका कुलपति कान्छाकुमार कर्माचार्य, क्रोधकला शिरोमणी कालु कुमाले र सोफाजका अध्यक्ष केशवराज खनालले संयुक्त रुपमा पुरस्कार प्रदान गर्नुभएको हो ।

कार्यक्रममा कुलपति केके कर्माचार्यले पुरस्कृतहरुलाई बधाई दिनुहुँदै ललितकलाको विकास र विस्तारमा मिडियाको भूमिका महत्वपूर्ण हुने बताउनुभयो ।

उहाँले सिर्जनाका अन्य विधामाभन्दा ललितकलामा पुरस्कार अत्यन्त थोरै रहेको चर्चा गर्नुहुँदै ललितकलाका क्षेत्रमा सक्रिय कलाकार तथा सञ्चारकर्मीलाई प्रोत्साहित गर्नसमेत पुरस्कार तथा लेखनबृत्तिको व्यवस्था गर्नुपर्नेमा जोड दिनुभयो ।

पुरस्कृत मध्येबाट सम्बोधन गर्दै हेमन्त गौतमले कला र कलाकारको उन्नयनका लागि ललितकला पत्रकारहरुको भूमिका अझै सशक्त हुनुपर्ने बताउनु भयो ।

नेपाल ललितकला पत्रकार समाज (सोफाज) का अध्यक्ष केशव खनालको अध्यक्षतामा सम्पन्न कार्यक्रममा प्राज्ञ रमेश खनालले पुरस्कृतहरुलाई शुभकामना दिनुभयो ।

यसैबीच, बिहिबार सम्पन्न सोफाजको साधारणसभाले केशवराज खनाललाई तीन वर्षका लागि पुनः अध्यक्षमा निर्वाचित गरेको छ । यस्तै, उपाध्यक्ष मधु शाही, महासचिव देवेन्द्र थुम्केली, सचिव संगीता श्रेष्ठ र कोषाध्यक्षमा सुनिता लोहनी चयन हुनुभएको छ । यसैगरी, सदस्यहरूमा दिवेशमान सिंह प्रधान, सुनिता साखकर्मी, सीताराम बडाल, रामनाथ घिमिरे र प्रकृति दाहाल हुनुहुन्छ । एक सदस्य पछि थप गरिने समेत जनाइएको छ ।

सम्बन्धित शीर्षकहरु