बाजुरामा ‘विकास कचहरी’ : तीन दिनसम्म विकास र समृद्धिमा बहस

• बैशाख २७, २०८२
• 0

‘बाजुराको बुढीगंगा नगरपालिकाले ‘समृद्धिको आधारका लागि बुढीगंगा विकास कचहरी’ भन्ने नारासहित तीन दिने विकास बहसको कार्यक्रम गर्न लागेको छ ।

बैशाख २७ देखि २९ गतेसम्म नगरपालिकाको केन्द्रमा आयोजना हुने कार्यक्रममा राजनीतिक दलहरूबीचको सहकार्य, स्थानीय तहको समृद्धि र दिगो विकासका विषयमा व्यापक बहस गरिनेछ ।

नगर प्रमुख रामबहादुर बानियाँले नेपाल न्यूज बैंकसँग कुरा गर्दै यो कार्यक्रम बुढीगंगाको समृद्धि र विकासका लागि नयाँ अभ्यासको रूपमा सुरु गरिएको बताए ।

प्रमुख बानियाँले भने, ‘बाजुरामा समस्या मात्रै छैन, सम्भावना पनि उत्तिकै छ, विभेद र विवाद मात्र होइन, एकता र अपनत्व पनि छ । संकट मात्रै होइन, अवसरहरू पनि प्रशस्त छन् — यही यथार्थ उजागर गर्न कार्यक्रम आयोजना गरिएको हो ।’

कार्यक्रमको उद्देश्य जिल्लाका सबै राजनीतिक दल र सरोकारवालाहरूलाई एउटै मञ्चमा ल्याएर साझा दृष्टिकोण विकास गर्नु हो । तीन दिनसम्म चल्ने कार्यक्रममा स्वास्थ्य, शिक्षा, कृषि, पर्यटन तथा सुरक्षित पूर्वाधार जस्ता पाँच मुख्य क्षेत्रका सम्भावना र चुनौतीबारे गहिरो बहस गरिने जनाइएको छ ।

कार्यक्रमको पहिलो दिन पालिकाबाट ६ वटा विषयमा कार्यपत्र प्रस्तुत गरिनेछ । प्रस्तुत विषयहरूमा क्षेत्रगत विज्ञ, बुद्धिजीवी र सरोकारवालाहरूले विश्लेषण र छलफल गर्नेछन् । दोस्रो दिन पालिकामा निर्माण सम्पन्न संरचनाहरूको उद्घाटन गरिनेछ ।

तेस्रो दिन कार्यपालिका भवनको उद्घाटनसँगै, बहसका क्रममा आएका सुझाव र टिप्पणीहरूलाई संकलन गरी घोषणापत्र तयार पारिने र त्यसको पुनः लेखन गरिनेछ ।

पालिका उपप्रमुख माया खड्का कुवँरले प्रमुख राजनीतिक दलका सांसद, पूर्व मन्त्री, प्रदेश सभा सदस्य, बुद्धिजीवी, समाजसेवी, पत्रकार, सरकारी तथा गैरसरकारी निकायका प्रतिनिधिहरू सहभागी हुने जानकारी दिइन् ।

कार्यक्रममा पूर्व प्रदेश प्रमुख देवराज जोशी, पूर्व मन्त्री कर्णबहादुर थापा, पूर्व सांसद लालबहादुर थापा, संविधान सभा सदस्य पेम्वा गुरुङ भोटे, प्रदेशसभा सदस्य पदम शाही लगायत विशिष्ट व्यक्तिहरूको उपस्थिति रहनेछ ।

स्थानीय तहको विकासका प्राथमिकता, आवश्यकता र समस्यालाई पहिचान गरी त्यसको यथार्थमा आधारित समाधानको खोजी गर्ने उद्देश्यले आयोजना गरिएको यो कार्यक्रम बाजुरामा विकास र समृद्धिको साझा एजेन्डा निर्माणतर्फको महत्वपूर्ण कदमको रूपमा हेरिएको छ ।

सम्बन्धित शीर्षकहरु

बाजुरामा ‘विकास कचहरी’ : तीन दिनसम्म विकास र समृद्धिमा बहस

ज्याकराण्डाले ढाकेको काठमाडौं (तस्वीरहरू)

सडक निर्माणमा स्थानीय र निर्माण व्यवसायीबीच विवाद

निर्माण गर्दागर्दै भत्कियो तामाकोसी माथिको ठेडीखोलाको पुल

आजको मौसम : देशको पहाडी भू–भागमा वर्षाको सम्भावना

सुदूरपश्चिमको पर्यटन विकासका लागि नीति, भौतिक संरचना र व्यवहारमा सुधार आवश्यक : मन्त्री पाण्डे

पाकिस्तानमा समस्यामा रहेका विद्यार्थीलाई नेपाली दूतावासमा सम्पर्क राख्न परराष्ट्र मन्त्रालयको आग्रह

ऊर्जा मन्त्रीको कामको प्रशंसा गर्दै सांसद चौधरीले संसदमै दिए बधाई

प्रधानमन्त्री ओली र भारतीय राजदूत श्रीवास्तवबीच भेटवार्ता

न्यायपूर्ण समाज निर्माणमा न्याय र कानून जगतको महत्वपूर्ण दायित्व छ : राष्ट्रपति