सर्वोच्चले कुलमानको पक्षमा दिएन अन्तरिम आदेश, कार्यकारी निर्देशक हितेन्द्रदेव शाक्यलाई निरन्तरता

रोजगारमञ्च
चैत्र २१, २०८१
0

नेपाल विद्युत् प्राधिकरणको कार्यकारी निर्देशक पदबाट हटाइएका कुलमान घिसिङको रिटमा सर्वोच्च अदालतले सरकारको निर्णयविरुद्ध अन्तरिम आदेश दिन अस्वीकार गरेको छ।

मङ्गलबारदेखि हेर्दाहेर्दैमा राखिएको घिसिङ र नवनियुक्त कार्यकारी निर्देशक हितेन्द्रदेव शाक्यको रिटमाथिको सुनुवाइ बिहीबार सकिए पनि घिसिङको मागअनुसार सरकारको निर्णय रोक्ने आदेश नआएको सर्वोच्च प्रशासनले जनाएको छ।

न्यायाधीशद्वय डा. कुमार चुडाल र नित्यानन्द पाण्डेयको इजलासले गरेको सुनुवाइपछि यो फैसला आएको हो।

गत सोमबार मन्त्रिपरिषद्ले घिसिङलाई हटाएर शाक्यलाई कार्यकारी निर्देशक नियुक्त गरेपछि घिसिङले आफ्नो पदावधि बाँकी छँदै बदनियतपूर्वक हटाइएको भन्दै सर्वोच्चमा रिट दायर गरेका थिए।

उनले सरकारको निर्णयविरुद्ध अन्तरिम आदेश माग गरेका थिए। तर, सर्वोच्चले अन्तरिम आदेश नदिएपछि शाक्यको नियुक्ति कायमै रहने भएको छ।

यता, शाक्यले चार वर्षअघि २०७८ साउन ३२ मा घिसिङको नियुक्ति गैरकानुनी भएको दाबीसहित दायर गरेको रिटमा कुनै टुङ्गो नलाग्दै हालको सुनुवाइ गर्न नमिल्ने जिकिरसहित अर्को रिट दायर गरेका थिए।

चार वर्षअघि तत्कालीन सरकारले शाक्यलाई जल तथा ऊर्जा आयोगको ऊर्जा विशेषज्ञ सदस्यमा सरुवा गरी घिसिङलाई प्राधिकरणको कार्यकारी बनाएको थियो।

शाक्यले आफूलाई गैरकानुनी रूपमा हटाइएको भन्दै उक्त निर्णय बदर गर्न माग गरेका थियो। हाल सरकारले शाक्यलाई पुनः कार्यकारीमा नियुक्त गरेपछि दुवै पक्षको रिट एकसाथ सुनुवाइ भएको हो।

सम्बन्धित शीर्षकहरु