प्रधानमन्त्री ओलीले आज थाइ समकक्षी सिनावातसँग भेट गर्दै

चैत्र २०, २०८१
0

औपचारिक भ्रमणका लागि थाइल्यान्ड पुगेका प्रधानमन्त्री केपी शर्मा ओली र थाइल्याण्डका प्रधानमन्त्री पे थोङ् थान् सिनावातबीच आज भेटवार्ता हुनेभएको छ ।

भेटवार्ता गर्नुअघि ओली थाइ समकक्षी सिनावातले आयोजना गरेको स्वागत समारोहमा सहभागी भए । थाइल्याण्डका प्रधानमन्त्रीको मैत्रीपूर्ण निमन्त्रणामा नेपालका प्रधानमन्त्रीबाट यो पहिलोपटक औपचारिक भ्रमण हो ।

भेटवार्तापछि संस्कृति र पर्यटन क्षेत्रमा सहकार्यसम्बन्धी सम्झौतापत्रमा हस्ताक्षर हुनेछ । साथै, दुई देशका गैरसरकारी र व्यावसायिक संस्थाबीच छ वटा सहमतिपत्र आदानप्रदान हुने परराष्ट्र मन्त्रालयले जनाएको छ ।

सम्झौतापछि दुवै प्रधानमन्त्रीको संयुक्त पत्रकार सम्मेलन हुनेछ । पत्रकार सम्मेलनपछि प्रधानमन्त्री ओली थाइ समकक्षी सिनावातले आयोजना गरेको दिवभोजमा सहभागी हुनेछन । प्रधानमन्त्री ओलीले आजै थाइल्याण्डका राजा महा बजिरालोङकर्नसँग शिष्टाचार भेट गर्ने कार्यक्रम तय भएको छ ।

बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिमस्टेक)को छैटौं शिखर सम्मेलनमा सहभागी हुन प्रधानमन्त्री ओली मंगलबार थाइल्यान्डको बैंकक पुगेका हुन ।

सम्बन्धित शीर्षकहरु