इमानका कोषाध्यक्ष लामा पुरस्कारसहित सम्मानित

फाल्गुन २६, २०८१
0

आर्थिक मिडियाको प्रतिनिधि संस्था इकोनमिक मिडिया एसोसिएसन नेपाल (इमान) को दोस्रो वार्षिकोत्सव र तेस्रो वार्षिक साधारणसभा भव्यताका साथ सम्पन्न भएको छ ।

कार्यक्रमका प्रमुख अतिथि प्रतिनिधि सभा सभामुख देवराज घिमिरेले आर्थिक मिडियाक्षेत्रमा उल्लेखनीय योगदान पुर्याएका लाइभ सेवा मिडिया प्रा.लि. तथा आर्थिक प्लस डटकमका अध्यक्ष अमिर लामालाई विशेष सम्मान प्रदान गरे।

सम्मान ग्रहण गर्दै अमिर लामाले आर्थिक पत्रकारिताको विकास र सुधारका लागि निरन्तर लागिरहने प्रतिबद्धता व्यक्त गरे । उनले आर्थिक मिडियाको भूमिका र यसले समाजमा पुर्याउन सक्ने प्रभावबारे पनि आफ्नो विचार राखे ।

सभामुख घिमिरेले कार्यक्रममा प्रेस स्वतन्त्रताको महत्त्वमा जोड दिँदै यसलाई सुरक्षित राख्नुपर्ने आवश्यकता बताए । उनले संविधानले प्रदान गरेको मौलिक अधिकारको रक्षा गर्नुपर्ने र प्रेस स्वतन्त्रतामाथि कुनै पनि प्रकारको हस्तक्षेप अस्वीकार्य रहेको बताए ।

कार्यक्रममा आर्थिक मिडियाको भूमिका र यसले देशको आर्थिक वृद्धिमा पुर्याउने योगदानबारे पनि विस्तृत चर्चा भयो। वक्ताहरूले आर्थिक पत्रकारिताले आम नागरिकलाई आर्थिक विषयमा जागरूक बनाउने र यसको सशक्तीकरणका लागि निष्पक्ष र पारदर्शी पत्रकारिता आवश्यक रहेको बताए।

इमानका अध्यक्ष, सदस्यहरू, विभिन्न आर्थिक मिडियाका प्रतिनिधिहरू, तथा अन्य गणमान्य व्यक्तिहरूको उपस्थितिमा सम्पन्न यस कार्यक्रमले आर्थिक मिडिया क्षेत्रको एकतालाई अझ मजबूत बनाउने र यसको प्रवर्द्धनमा सकारात्मक योगदान दिने संकेत गरेको छ ।

कार्यक्रमले आर्थिक मिडियाको भूमिका र महत्त्वलाई पुनः प्रष्ट्याउँदै यस क्षेत्रमा निरन्तर सुधार र विकासका लागि आवश्यक कदम चाल्न आह्वान गरेको छ ।

सम्बन्धित शीर्षकहरु