बरिष्ठ विमान परिचालिका (फ्लाइट एटेण्डेन्ट) ओम्निका डंगोलले रुसस्थित युरोपको सबैभन्दा अग्लो हिमाल माउण्ट एल्ब्रसको सफल आरोहण गरेकी छन् ।
उनले आइतबार बिहान रुसी समयअनुसार ६ः१५ बजे ५ हजार ६ सय ४२ मिटर अग्लो माउण्ट एल्ब्रसको आरोहण गरेकी हुन् । उनले अर्की आरोही फुर्पा शेर्पा र पर्वतारोही तथा माउण्टेन गाइड चतुर तामाङका आरोहण गर्न सफल भएकी हुन् ।
उडान परिचारिका डंगोलले यसअघि विश्वको सर्वोच्च शिखर सगरमाथाको पनि सफल आरोहण गरिसकेकी छन् । विश्वका अरु अग्ला हिमालहरु आरोहण गर्ने अभियानमा रहेकी डंगोलले सगरमाथा चढ्नुअघि लोबुचे, मेरा र आइलन्ड पिकहरुको सफल आरोहण गरेकी थिइन् ।
सगरमाथा आरोहण गर्ने पहिलो विमान परिचालिकाको रुपमा आफ्नो नाम लेखाउन सफल भइसकेकी डंगोलले बाँकी पाँच महादेशका सबैभन्दा अग्ला हिमालहरु पनि चाँडै आरोहण गर्ने योजना बनाएकी छन् ।
निजी क्षेत्रको उड्डयन सेवा हिमालय एयरलाइन्समा विगत आठ बर्षदेखि कार्यरत डंगोल सामाजिक सेवामा आफुलाई समर्पित बनाउने लक्ष्य लिएकी छिन् ।
