नेपाल भ्रमणमा रहेका मलेसियाका गृहमन्त्री फुद्दिन नासुसन इजमाइलले नेपाल स्वास्थ्य व्यवसायी महासंघका अध्यक्ष अध्यक्ष कैलाश खड्काको स्वास्थ्य संस्था अनमोल मेडिकल सेन्टरको अनुगमन गरेका छन् ।
मलेसिया जाने कामदारको बायोमेट्रिक स्वास्थ्य परीक्षण गर्ने स्वास्थ्य संस्थाको अनुगमन गर्ने क्रममा सिनामंगलमा खड्काले संचालन गर्ने अनमोल मेडिकलको निरीक्षण गरेका हुन् । मलेसिया जाने कामदारले मलेसियाले तोकेका ३६ वटा संस्थाबाट मात्र मेडिकल जाँच गर्नु पर्ने हुन्छ । त्यसमध्येको अनमोल एक हो ।
मलेसिया सरकारको विदेशी कामदार केन्द्रीय व्यवस्थापन प्रणाली (एफडब्लुसिएमएस)सँग जोडिएको प्रणाली उक्त ३६ वटा स्वास्थ्य संस्थाले प्रयोग गर्दछन् ।
मलेसियाका गृहमन्त्री इजमाइलले गुणस्तरीय स्वास्थ्य परीक्षणमा मलेसिया सरकारको जोड रहेको बताउँदै गृह मन्त्रालयले आवश्यकता अनुसार स्वास्थ्य परीक्षण केन्द्रको अनुगमन गर्न टोली पठाउने बताएका छन् ।
नेपाल स्वास्थ्य व्यवसायी महासंघका अध्यक्ष कैलास खड्काले गृहमन्त्री इजमाइललाई अनमोल सेन्टरमा स्वागत गर्दै कामदारको गुणस्तरीय स्वास्थ्य परीक्षण गर्न मलेसियाका स्वास्थ्य मापदण्डलाई पूर्ण रुपमा पालना गरेको बताए ।
नेपाल र मलेसियाबीच २०७५ कात्तिकमा श्रम सम्झौतापछि दुई देशका गृह, श्रम, परराष्ट्र र कानुन मन्त्रालयका उच्च अधिकारीहरू संलग्न दोश्रो संयुक्त प्राविधिक बैठकले नेपालमा कामदारले स्वास्थ्य परीक्षण गर्न लागेको खर्च मलेसिया पुगेपछि पहिलो महिनामा रोजगारदाताले सोधभर्ना दिने निर्णय गरेको थियो ।
