काठमाडौ उपत्यकामा हालसम्मकै बढी १३४ जनामा कोरोना भेटियो, देशभर थप ६३८ जनामा संक्रमण पुष्टि
- साउन २७, २०७७
- 0
पछिल्लो २४ घण्टामा काठमाडौ उपत्यकाका १३४ सहित देशभर थप ६३८ जनामा कोरोना संक्रमण पुष्टि भएको छ । योसँगै देशभर संक्रमितको कुल संख्या २३ हजार ९४८ पुगेको स्वास्थ्य तथा जनसंख्या मन्त्रालयले जानकारी दिएको छ ।
उपत्यकाको काठमाडौमा हालसम्मकै सबैभन्दा बढी ११० जनामा संक्रमण पुष्टि भएको छ भने भक्तपुरमा ८ र ललितपुरका १६ जनामा गरी १३४ जनामा संक्रमण पुष्टि भएको हो ।
यस्तै आज थप १७१ जना डिस्चार्ज भएसँगै कुल डिस्चार्ज हुनेको संख्या १६ हजार ६६४ पुगेको छ । निको हुनेको दर कुल संक्रमितमध्ये ६९.६ प्रतिशत पुगेको छ ।
थप ४ को मृत्यु
पछिल्लो २४ घण्टामा कोरोना भाइरसबाट थप ४ जनाको मृत्यु भएको पुष्टि भएको छ । धनुषा, काभ्रे र सिन्धुपाल्चोकका गरी थप ४ जनाको मृत्यु भएको हो ।
मृत्यु हुनेमा धनुषाका ६० र ५० वर्षीय पुरुष, काभ्रेकी ५० वर्षीया महिला तथा सिन्धुपाल्चोकका ८४ वर्षीय पुरुष रहेका छन् ।
योसँगै देशभर कोरोना संक्रमणबाट मृत्यु हुनेको कुल संख्या ८३ पुगेको छ ।