काठमाडौँमा ७ सहित थप ११६ जनामा कोरोना भेटियो, थप १ जनाको मृत्यु पुष्टि
- असार ३१, २०७७
- 0
पछिल्लो २४ घण्टामा काठमाडौँमा ७ सहित देशभर ११६ जनामा कोरोना सङ्क्रमण पुष्टि भएको छ । योसँगै कुल सङ्क्रमित १७ हजार १७७ पुगेको र सक्रिय सङ्क्रमित ६ हजार ११४ रहेको स्वास्थ्य तथा जनसङ्ख्या मन्त्रालयले जानकारी दिएको छ ।
आज उपत्यकाको काठमाडौँमा ७ जनामा संक्रमण पुष्टि भएको मन्त्रालयद्धारा आयोजित पत्रकार सम्मेलनमा जानकारी दिइएको छ ।
यस्तै आज ६९७ जना सङ्क्रमित निको भएर डिस्चार्ज भएसँगै निको हुनेको संख्या ११ हजार २५ पुगेको छ । याे कुल सङ्क्रमित भएर निको भएको सङ्ख्याको ६४.२ प्रतिशत हाे ।
यस्तै आज थप एकजनाको कोरोना भाइरसको कारणले मृत्यु स्वास्थ्य मन्त्रालयले पुष्टि गरेको छ । रौतहटका ३६ वर्षीय पुरूषको असार ३१ गते साढे २ बजे निधन भएको मन्त्रालयले जानकारी दिएको हो । योसँगै कोरोनाका कारण मृत्यु हुनेको सङ्ख्या ३९ पुगेको छ ।