डेढ सातापछि सेयर बजारमा सुधार, १० अंकले बढ्यो नेप्से

माघ १४, २०८०
0

सेयर बजार परिसूचक नेप्सेमा डेढ सातापछि सुधार आएको छ । साताको पहिलो दिन आइतबार कारोबार बढेको छ ।

नेप्से आज १०.३७ अंकले बढेर २०९४.४६ विन्दुमा कायम भएको छ । १ सय ७३ कम्पनीको सेयर मूल्य बढेको छ भने ७० कम्पनीको घटेको छ । चार कम्पनीको सेयर मूल्य स्थिर रह्यो ।

बैंकिङ, होटल, उत्पादन र म्युचल फन्ड समूहबाहेक अरू सबै समूहको सेयर सामान्य बढेको छ । मध्य सोलु, माथिल्लो मैलुङखोला जलविद्युत् र साम्लिङ पावर कम्पनीको सेयर मूल्य १० प्रतिशतले बढेको छ ।

समग्रमा बजार बढेको दिन आज सबैभन्दा धेरै चन्द्रागिरि हिल्सको सेयर झन्डै नौ प्रतिशतले घटेको छ ।

आज एक करोड ७ लाख कित्ता सेयर तीन अर्ब ८३ करोड ३७ लाख रुपैयाँमा कारोबार भएको नेपाल स्टक एक्सचेन्जले जनाएको छ ।

कारोबारका आधारमा हिमालयन रिइन्स्योरेन्स, ज्ञादी ग्रुप अफ पावर, रिलायबल नेपाल लाइफ इन्स्योरेन्स, अरुण भ्याली हाइड्रोपावर र हाथवे इन्भेस्टमेन्ट कम्पनीको सेयर कारोबारमा अगाडि रहे । हिमालय रिको ३३ करोड ५३ लाख, ज्ञादीको २३ करोड ५३ लाख र रिलायबलको १७ करोड ५३ लाख रुपैयाँ बराबरको सेयर कारोबार भएको छ ।

सम्बन्धित शीर्षकहरु