सलिकोले दियो एफम्यानका सदस्यहरुका लागि ‘बीमा सम्बन्धि जनचेतना’

पर्वत वि.क.
भदौ ६, २०८१
0

सगरमाथा एण्ड लुम्बिनी इन्स्युरेन्स कम्पनी लिमिटेड (सलिको)ले फूटवेयर म्यानुफ्याक्चर्स एशोसियसन अफ नेपाल (एफम्यान)मा आवद्ध सदस्यहरुका लागि बीमा सम्बन्धि जनचेतना कार्यक्रम आयोजना गरेको छ ।

नेपाल बीमा प्राधिकरणका निर्देशक सुशिलदेव सुवेदीको प्रमुख आतिथ्यतामा सम्पन्न कार्यक्रममा एफम्यानमा आवद्ध पदाधिकारीहरुलाई बीमा सम्बन्धि नीति, नियम र उद्योगीहरुका लागि बिमाको महत्वको विषयमा तालिम प्रदान गरिएको हो ।

कार्यक्रममा बोल्दै एफम्यानका अध्यक्ष रुद्र न्यौपानेले सलिकोले फुट्वेयर म्यानुफ्याक्चर्स एशोसियसन अफ नेपाललाई प्रदान गरेको जनचेतना कार्यक्रम एकदमै फलदायी रहेको बताए ।

उद्योगीहरुलालाई बीमाको बारेमा राम्रोसँग जानकारी नहुँदा धेरै समस्या झेल्नुपरेको बताउँदै उनले बीमा सबैका लागि एकदमै आवश्यक रहेको र सबै उद्योगीहरुले आफ्नो उद्योगको अनिवार्य बीमा गराउँन समेत आग्रह गरे ।

त्यस्तै कार्यक्रमका प्रमुख अतिथि तथा बीमा प्राधिकरणका निर्देशक सुवेदीले सलिकोले बीमाको आवश्यकता र महत्व सम्बन्धि एकदमै महत्वपुर्ण कार्यक्रम आयोजना गरेकोमा खुशी व्यक्त गरे ।

उनले भने ‘जसले बीमाको बस्तुको उपयोग गर्छ उसले बीमाको बारेमा नबुझेसम्म बीमाको बास्तविक बजार हुन सक्दैन र बीमालाई सही ढंगले उपयोग पनि गर्न सकिदैन त्यसकारण जसलाई बीमा चाहिएको छ जसले बीमा किन्छ त्यो पक्षलाई जागृत गराउने जुन प्रयत्न छ त्यो एकदमै प्रशंसनीय छ ।’

सलिकोकी डिसिईओ बारिष्मा साउद आचार्यले संस्था स्थापनादेखि हालसम्मका गतिविधिहरुको बारेमा प्रकाश पारेकी थिइन् । उनले कम्पनीको मुख्य उद्देश्य उच्चस्तरिय सेवा दिने र ग्राहकहरुलाई पनि बीमा भन्ने बित्तिकै सगरमाथा एण्ड लुम्बिनी इन्स्युरेन्स भनेर दिमागमा आउने बनाउने लक्ष्य रहेको बताईन् ।

सगरमाथा र लुम्बिनी इन्स्युरेन्स कम्पनी मर्ज भएपछि कम्पनी एकदमै शसक्त र आर्थिक हिसाबले पनि बलियो भएको बताउँदै उनले अहिले आफ्नो कम्पनीमा २ अर्ब ६२ करोड पुँजी भएको जानकारी दिईन् ।

कार्यक्रममा सलिकोका अनराइटिङ प्रमुख दिवस तिमल्सिनाले करिब १ घण्टा बीमाको बारेमा प्रिजेन्टसन गरेका थिए । त्यस क्रममा उनले बीमा प्रावधान, नीति, बिमाका प्रकारहरुको बारेमा जानकारी दिएका थिए ।

त्यस्तै कार्यक्रममा सलिकोका क्लेम प्रमुख सुभाष दीक्षितले कस्तो अवस्थामा बीमा दाबी गर्न मिल्छ र कस्तो अवस्थामा दाबी गर्न मिल्दैन भनेर स्पष्ट गराएका थिए । त्यस्तै बीमा दाबी गसिकेपछि कति समयमा बिमा रकम प्राप्त हुन्छ यसको प्रावधान के छ भनेर जानकारी गराएका थिए ।

कार्यक्रममा बोल्दै सलिकोका सिईओ चंकी क्षेत्रीले पछिल्लो समय सलिको नेपालकै १ नम्बर बीमा कम्पनी बन्न सफल भएको बताए । सबै उद्योगीहरुलाई बीमाको महत्व तथा बिमा गरिसकेपछि जोखिम न्युनिकरण हुने र जस्तोसुकै आपत विपत् आईपरेपनि ढुक्क भएर आफ्नो व्यवसायलाई निरन्तरता दिन सकिने भन्दै सबै उद्योगी व्यापारी व्यवसायीहरुलाई आफ्नो व्यवसायको अनिवार्य बीमा गर्न आग्रह गरे ।

इन्स्युरेन्स अवार्नेस कार्यक्रम उद्योगी व्यवसायीहरुका लागि अति नै आवश्यक रहेको बताउँदै उनले आगामी दिनहरुमा पनि यस्ता कार्यक्रमहरलाई निरन्तरता दिदै जाने समेत प्रतिवद्धता जनाए ।

कार्यक्रममा एफम्यानका वरिष्ठ उपाध्यक्ष सुरज बन्जाडेले कार्यक्रम अति नै फलदायी भएको बताए । कार्यक्रमबाट बीमाको महत्व प्रकृया र प्रावधानको बारेमा सम्पुर्ण उद्योगीहरुले ज्ञान प्राप्त गरेको जानकारी दिए । साथै यस्ता कार्यक्रम देशैभरका उद्योगी व्यवसायीहरुका लागि आवश्यक रहेको समेत उनले बताए ।

कार्यक्रममा एशोसियसनका वर्तमान कार्यसमितिका पदाधिकारीहरु, पूर्वअध्यक्षहरु तथा विभिन्न जुत्ता कम्पनी संचालकहरुले सहभागिता जनाएका थिए ।

सम्बन्धित शीर्षकहरु